Nan yon piblikasyon li fè sou kont X li jodi lendi 3 fevriye 2025 lan, premye minis Kanadyen an Justin Trudeau anonse prezidan Trump deside fè bak ak tarif dwanye 25 % li te mete sou pwodui kanadyen yo. Li fè konnen, Trump fè yon kanpe ak dosye sa pou 30 jou.
«Tarif dwanye ki te pran yo sou poz pou pi piti 30 jou. Pandan nou menm n ap travay ansanm», se pawòl sa yo Premye minis la deklare pandan li soulinye li te genyen diskisyon ak chèf leta ameriken an. Yon lòt kote, li fè konprann gouvènman kanadyen an deja pran divès mezi pou fè fas kare ak trafik dwòg sou fwontyè yo pataje ak Etazini yo.
Paralèlman, Donald Trump deside pran yon poz tou sou tarif dwanye li te mete sou Meksik la tou. Tout desizyon sa yo vini aprè gouvènman kanadyen an ak meksiken an pa t deside gade Trump konsa, puiske yo menm tou yo te deside enpoze 25 % taks sou pwodui ameriken yo nan peyi yo.
N ap raple, prezidan ameriken an te pran desizyon pou enpoze kantite pousantaj dwàn sa sou Kanada, Meksik ak Lachin nan dat ki te samdi premye fevriye 2025 lan. Lachin, li te enpoze 10% sou li, menase jiskounye a pou pran mezi bò kote pa yo tou pou kapab defann enterè peyi yo.
Fòk nou di, tousuit aprè li te pran mezi kont peyi sa yo, chèf leta ameriken an te rekonèt se te yon move desizyon ki ta pral fè Etazini soufri. Yon reyaksyon ki eksplike kounye a nouvo desizyon li pran jodi lendi 3 fevriye a pou fè bak ak tarif dwanye sa yo.
Atik sa se pwopriyete prive ©️ Gwoup Medya MAGHAITI 2025
