Arete jounal le Moniteur ki revoke Garry Conille nan tèt gouvènman an pou ranplase l avèk Alix Didier Fils-Aimé pran lari jodi dimanch 10 novanm 2024 la, poutan daprè sa ki ekri nan dokiman an li te dwe pibliye ofisyèlman demen lendi 11 novanm nan. Arete sa a pibliye aprè yon reyinyon ki te fèt nan lannuit vandredi 8 novanm 2024 la, kote manm Konsèy Prezidansyèl Tranzisyon an (KPT) te deside nan yon rezolisyon pou retire Garry Conille kòm Premye minis peyi a.
« Lè n konsidere rezolisyon ki pran nan dat 8 novanm 2024 la, Konsèy Prezidansyèl Tranzisyon an nan konsansis chwazi kòm premye minis Alix Didier Fils-Aimé », daprè sa nou li nan arete Le Moniteur a ki ta dwe pibliye lendi 11 novanm nan.
Smith Augustin, Louis Gérald Gilles, Fritz Alphonse Jean, Laurent Saint-Cyr, Emmanuel Vertilaire, Leslie Voltaire, Régine Abraham, ak Frinel Joseph se moun sa yo ki siyen rezolisyon sa pou revoke Garry Conille an. Nan tout 9 manm KPT a se sèlman Edgard Leblanc Fils ki pa t deside siyen rezolisyon sa.
Se yon dezisyon ki vini aprè gwo pwoblèm ki te genyen ant Premye minis Garry Conille ak KPT a. Kote nan yon bò, PM nan pa t vle revoke minis zafè etranjè li a, Dominique Dupuy aprè eskandal ki te fèt Etazini an. E nan yon lòt bò, li pa t vle fè chanjman nan gouvènman li an e t ap mande pou 3 konseye prezidan ki enplike nan dosye koripsyon BNC a pou ta retire kò yo nan KPT a.
Poutan, fòk nou di PM Garry Conille te pran devan nan yon lèt korespondans li te voye jodi dimanch lan bay direktè jeneral jounal Le Moniteur a, Ronald Saint-Jean kote li te mande l pou pa pibliye rezolisyon revokasyon Konsèy la pran an.
Pou sa ki konsène nouvo chwa Konsèy la, n ap raple Alix Didier Fils-Aimé te kandida pou te premye minis nan moman KPT a te gen pou l te chwazi moun ki ap dirije peyi a aprè demisyon Ariel Henry. Nan lane 2016, li te kandida pou senatè Lwès.
Atik sa se pwopriyete prive © Gwoup Medya MAGHAITI 2024
