Nan yon kominike yo pibliye ayè mèkredi 30 oktòb 2024 la, Biwo Entegre Nasyonzini an Ayiti (BINUH) fè konnen jij ki sou dosye masak Lasalin nan voye 30 moun devan tribinal kriminèl. Pami moun sa yo nou jwenn plizyè chèf gang ak aktè politik nan lavi nasyonal la.
Jimmy Chérizier alyas Babekyou, chèf gang ti bwa a, Chéry Christ-Roi alyas Krisla, ansyen chèf gang Lasalin nan, Léonel Altona, epi aktè politik tankou Fednel Monchéry ak Pierre-Richard Duplan, se pami moun sa yo estrikti a revele ki dwe al jije devan tribinal kriminèl san asistans jiri.
Masak Lasalin nan te fèt nan lannuit 13 pou rive 14 novanm 2018, kote anviwon 72 moun te pèdi lavi yo selon òganis k ap defann dwa moun yo. Selon Rapò Rezo Nasyonal k ap Defann Dwa Moun yo (RNDDH) te sòti sou masak la, gang ki te sou kontwòl Ti Junior a te antre nan plis pase 150 kay kote yo te rache gason kou fanm, gen nan yo yo te menm boule.
Mete sou sa, 7 fanm te sibi zak vyolans seksyèl, 5 moun te sòti blese, plizyè lòt te disparèt. Pou sa ki gade byen yo, RNDDH te fè kwè nan rapò sa 439 viktim li te rive pale ak yo te deklare yo te pèdi tout afè yo nan masak sa a. Se pou sa òganis dwa moun sa ymte mande pou lajistis pini tout moun ki te enplike nan masak sa san okenn konsiderasyon.
Atik sa se pwopriyete prive ©️ Gwoup Medya MAGHAITI 2024
