Yon gwo dife eklate jodi dimanch 5 janvye 2025 lan nan mache Chada ki twouve l nan Petyonvil. Menmsi ponpye te sou plas, anpil machandiz te deja pase anba flanm dife, daprè sa kèk machann fè konnen.
Selon machann yo pèsonn pa konnen kisa ki rive lakoz dife sa pran nan mache a. An konsekans yo fè konprann yo pèdi anpil lajan puiske gen anpil machandiz tankou telefòn ak pwodui alimantè ki boule.
« Se gras ak ponpye ki fè nou sove kèk ti grenn bagay. Se pou leta pran responsabilite l pou l konn sa l ap di ansanm ak nou », se pawòl sa yo youn nan machann telefòn ki pèdi machandiz li deklare.
N ap soulinye, pou dènye ane sa yo dife eklate nan plizyè mache keseswa nan Pòtoprens oubyen nan vil pwovens yo, e jiskounye a menm bagay yo toujou ap repete. Nan mache sa yo ki te boule a nou jwenn mache Dèlma 30 lan, mache Petyonvil la ak mache kominal Gonayiv la.
