Nan yon seremoni yo fè ayè jedi 19 desanm 2024 la, gouvènman ayisyen an resi mete sou pye yon sal pwodiksyon oksijèn nan Lopital lapè ki twouve l nan Dèlma 33. Pati sa rive mete nan lopital leta a aprè Ajans Ameriken pou Devlopman Entènasyonal (USAID) li menm te rive bay gouvènman Alix Didier Fils-Aimé a 4 jeneratè oksijèn.
Nan diskou li te fè pou seremoni an, Minis sante a, doktè Duckenson Lorthé Bléma fè konprann nouvo sal sa ap pèmèt pwofesyonèl sante yo sove lavi plis moun epi reponn pi byen nan ka ki konn depase nan lopital la. Se sa k fè, li pwomèt Ministè li ap dirije a angaje l pou ranfòse kapasite espas sanitè sa, nan lide pou yo ka kontinye fè travay yo ki se bay popilasyon an laswenyay.
Anplis sa, minis la te pwofite fè tout moun konnen jounen jodi a lopital lapè (HUP) ap kapab fè pou kont li chak jou ant 20 ak 24 bonbòn oksijèn. Yon aksyon, selon direktè egzekitif lopital la, doktè Paul Junior Fontilus ki vini nan yon bon moman, puiske li deklare lopital la anrejistre chak jou plis pase 30 demann bonbòn oksijèn.
Paralèlman, laprimati nan nòt li te pibliye nan sikonstans lan fè kwè reouvèti lopital jeneral se youn nan pi gwo priyorite ki genyen. Paske, yo soulinye se la popilasyon an konn jwenn swen espesyalize yo. Annatandan, yo mansyone yo kontinye ap fè jefò pou bay lopital lapè medikaman anestezan nesesè yo pou ranfòse blòk operatwa yo genyen yo.
Atik sa se pwopriyete prive ©️ Gwoup Medya MAGHAITI 2024
