Gouvènman Alix Didier Fils-Aimé a anonse ayè vandredi 6 desanm 2024 la li bay lòd pou Asistans Ekonomik ak Sosyàl (FAES) ak Direksyon Pwoteksyon Sivil (DPC) ede viktim inondasyon yonan Okap ak Jeremi. Nan sikonstans sa, Premye minis lan voye mesaj bay fanmi sa yo pou l fè yo konprann yo pa pou kont yo.
«Dram sa fè tout nasyon an mal. Mwen vle voye yon mesaj rekonfò bay chak fanmi ki viktim: Nou pa pou kont nou, gouvènman nou an bò kote nou, e nou pran tout dispozisyon pou akonpanye nou nan chemin sa pou n kenbe epi pou nou ka leve», se sa nou li nan yon kominike laprimati te pibliye ayè vandredi a.
Kòm aksyon, chèf gouvènman an, Alix Didier Fils-Aimé fè konnen responsab Asistans Ekonomik ak Sosyàl (FAES) ak Direksyon Pwoteksyon Sivil (DPC) gen lòd pou yo aji pou viktim yo. Nan sans sa, laprimati anonse plizyè ekip deja mobilize pou fè moun yo jwenn kit manje ak sanitè.
Pi lwen, li soulinye gen yon selil kriz ki aktivite. Tout sa se yon fason pou kapab voye je sou operasyon sekou yo, planifye jan kay ki kraze yo pral refèt.
N ap soulinye, akoz fenomèn meteyowolojik ki rele Fwon Fwa ki sou peyi a, plizyè zòn nan Okap ak nan Jeremi te inonde. Sa ki te lakoz yon fanmi peri nan Okap anplis yon lòt timoun, tandiske nan Jeremi genyen anviwon 3 moun ki mouri, 13 blese, 3 disparèt ak 60 fanmi ki al viv nan kan. Anplis sa genyen tou divès kay ki kraze pandan pil lapli ki t ap tonbe a.
Atik sa se pwopriyete prive ©️ Gwoup Medya MAGHAITI 2024
