Nan yon kominike yo pibliye jodi vandredi 29 novanm 2024 la, gouvènman Alix Didier Fils-Aimé ap dirije a salye memwa viktim masak riyèl Vayan yo. Nan deklarasyon l yo, chèf gouvènman an konsidere evènman sa a kòm yon devwa memwa nan istwa peyi a.
«Nanm moun sa yo ki tonbe paske yo te kwè nan yon demen miyò pap janm efase», se ak pawòl sa yo Premye minis lan tante make jounen 29 novanm nan. Jodi vandredi sa menm fè 27 lane depi plis pase 30 moun te pèdi lavi yo pandan yo t al vote nan lekòl Nasyonal Ajantinn Bèlgad nan eleksyon ki te fèt aprè rejim Duvalier a.
Pi lwen, chèf gouvènman an fè konprann memwa viktim sa yo dwe voye yon mesaj klè pou nou panse sou byenfè lajistis, diyite ak sekirite ka genyen nan peyi a. Se sa k fè, li deklare : «San konpatriyòt nou yo ki te koule 29 novanm 1987 la pou libète nou dwe raple nou Ayiti merite pi bon bagay».
Pou fini, laprimati mande pou pèp ayisyen an kontinye onore memwa moun sa yo pandan n ap pousuiv rèv yo. Kote Ayisyen ap viv nan yon peyi ki gen sekirite, epi eleksyon lib rive fèt ladan l.
Atik sa se pwopriyete prive ©️ Gwoup Medya MAGHAITI 2024
