Richardson Séraphin se non jounalis sa gouvènman Garry Conille an chwazi vandredi 9 dawout 2024 la, pou pran tèt kominikasyon nan Office Assurance Véhicules Contre-tiers (OAVCT). Selon direktè jeneral la ki se Fritzner Bernadel, chwa sa fèt nan lide pou ranfòse enstitisyon leta a.
Si otorite yo nan leta chwazi jounalis la ki nan tèt Analyse Média pou jere zafè kominikasyon ak inovasyon administratif nan OAVCT, Asosiyasyon Ayisyen Medya an Liy yo (AHML) li menm te mete sitwayen an deyò pou respè règ asosiyasyon an li pa t genyen.
“Nan nòt sa, Asosiyasyon Ayisyen Medya an Liy yo (AHML) regrèt pou l fè konnen desizyon rapid li pran pou separe l avèk Analyse Média, ki gen Richardson Séraphin ki reprezante l nan mitan nou“, daprè sa ki ekri nan yon nòt Asosiyasyon an te pibliye 26 jiyè 2024 la. Pou kontinye, responsab yo nan estrikti a eksplike se paske jounalis la te tanmen kèk aksyon ki pa t bon pou asosiyasyon an ki fè yo te pran desizyon sa a kont medya li a.
Pandantan sa, nan yon mesaj yo pibliye sou kont X yo jodi lendi 12 dawout la, Analyse Média bò kote pa l pito kritike desizyon AHML pran pou fòmasyon nouvo komite yo genyen depi jedi 8 dawout 2024 la. Poutan, yo pa fè okenn reyaksyon pa rapò ak desizyon ki te pran kont yo nan mwa jiyè a.
Menmsi AHML pa revele kisa pwofesyonèl nan odyovizyèl la te fè pou mete l deyò ak tout medya li a, yon sous nou ka fè konfyans fè nou konnen se ta yon dokiman sansib li te pibliye, pou te atire atansyon gouvènman an. Yon lòt bò, menm sous sa deklare nou se menm ajisman sa yo ki te pèmèt madanm jounalis la te rive jwenn yon plas nan youn nan bwàt leta yo.
“Se presyon li te fè sou moun yo, ki fè yo te mete madanm li nan yon pòs nan bwàt leta a. Enbyen se menm pwosesis la ki fè li menm li ka benefisye pòs li genyen jodi a”, se pawòl sa yo sous nou an deklare pandan li mande pou nou kenbe idantite l.
N ap fè konnen, nouvo direktè kominikasyon OAVCT a, Richardson Séraphin se youn nan pèsonalite ki chaje ak move akizasyon sou do l. Kòm moun ki ap nonsèlman manipile piblik la, men tou ki pa sispann defòme enfòmasyon pou negosye nan pwòp enterè l. Dayè selon plizyè pèsonalite, sitwayen an ta fè pati yon faktori ki la pou defòme verite yon fason pou fè moun konprann li nan fason yo vle a.
sa se pwopriyete prive ©️ Gwoup Medya MAGHAITI 2024
