Nan yon kominike yo pibliye ayè madi 17 desanm 2024 la, gouvènman Alix Didier Fils-Aimé a anonse 3 mezi rapid yo pran pou asire sekirite lopital Bernard Mevs la. Desizyon sa vini kèk tan aprè bandi ak zam te atake epi boule yon pati nan lopital sa, ki se youn nan pi gwo yo nan domèn twomatoloji ak newochiriji.
Nan sans sa, laprimati pwomèt lapolis ap toujou anndan ak nan tout perimèt lopital Bernard Mevs pou garanti sekirite pèsonèl sante yo ak malad yo, yo di tou y ap bay resous nesesè pou sèvis yo kapab kontinye. Anplis sa, yo soulinye deja gen yon plan sekirite ki pral mete anplas anfavè tout espas sanitè, ki mande sa, sou tout teritwa nasyonal la.
Mete sou kote mezi yo di yo ap pran yo, gouvènman an di li kondane zak sa nèg ak zam yo fè sou lopital sa k ap sèvi popilasyon an depi anviwon 30 lane.
«Premye minis lan kondane ak tout fòs li zak san reflechi sa ki gen pou objektif simen latwoublay epi rann nasyon an pi fèb», daprè sa nou li nan kominike sa a. Pi lwen, chèf gouvènman an deklare « pap gen ni repi, ni tolerans pou sila k ap menase sekirite ak lavi sitwayen nou yo ».
Pandan li kondane zak bandi yo, gouvènman Alix Didier Fils-Aimé di li eksprime tout solidarite l pou pèsonèl medikal ak malad ki frape pa rapò ak sikonstans sa a. Nan menm tan an, li felisite travay Polis Nasyonal Ayiti a (PNH) ki selon li, te repouse plizyè fwa gang yo.
Atik sa se pwopriyete prive ©️ Gwoup Medya MAGHAITI 2024
