Gouvènman tranzisyon an anonse 23, 24 ak 25 septanm k ap vini la se ap 3 jounen dèy nasyonal nan peyi a. Desizyon sa pran nan lide pou kapab rann omaj ak plis pase yon ventèn moun ki pèdi lavi yo samdi ki te 15 septanm 2024 la, nan yon eksplozyon kamyon sitèn ki te fèt nan Miragwàn.
Desizyon pou deklare 3 jou dèy nan peyi a pran ayè mèkredi 18 septanm 2024 la, pandan yon konsèy minis.
N ap raple, eksplozyon kamyon sa lakoz anviwon 20 moun pèdi lavi yo ak plis pase 40 lòt te boule. Ensidan sa te rive aprè kamyon ki t ap pote gaz la te chavire epi kèk manm nan popilasyon an te al ranmase gaz.
Menm jou dram sa, gouvènman tranzisyon an atravè plizyè anbilans te pèmèt kèk viktim al pran swen an ijans nan divès lopital nan depatman Sid peyi a. N ap soulinye tou, yon elikoptè Nasyonzini te transpòte plizyè lòt viktim nan kapital la. Chèf primati a, Gary Conille te pwofite moman sa pou l te anonse tout sipò l ak fanmi moun ki viktim yo.
Atik sa se pwopriyete prive ©️ Gwoup Medya MAGHAITI 2024
