Nan yon kominike yo chak la pibliye ayè dimanch 20 avril 2025 lan, Gouvènman ayisyen an ak anbasad Lafrans an Ayiti salye memwa 3 sòlda FAD’H ki te tonbe Kenskòf yo. Sòlda lame Ayiti sa yo mouri ayè dimanch lan nan moman yo ta pral pote ranfò ak fòs lòd yo ki ap batay kont gang yo nan komin Kenskòf.
«Se ak anpil tristès gouvènman Repiblik la ap anonse lanmò 3 nan militè ak anpil valè nou yo Kenskòf pandan yo t ap fè travay yo», daprè sa ki ekri nan kominike laprimati sòti a. Menm jan an tou, genyen anbasad Lafrans nan peyi a ki eksprime respè yo pou memwa sòlda sa yo. Yo pwomèt y ap kontinye sipòte tout fòs k ap goumen kont gang yo an Ayiti.
Pandan gouvènman an fè konprann viktim sa yo mouri nan pye travay yo, poutan, enfòmasyon yo fè konnen machin yo te ye pou te al pote ranfò a pa t blennde. Se sa ki pèmèt, nan atak gang yo fè sou yo a gen 3 nan yo ki mouri pandan gen plizyè lòt ki blese.
Pi lwen, yo pwofite sikonstans lan pou di tout moun leta bon jan mobilize pou goumen kont ensekirite a. Se poutèt sa yo deklare : «nou derefize laperèz anvayi menm yon lizyè sou sòl nou an, nou derefize kite vyolans la mennen nou. Batay sa, se pou tout pep ayisyen an, e nou ap genyen li .»
Pou kounye a, gen divès viktim nan kan fòs lòd yo menm jan gen plizyè bandi tou ki te jwenn lanmò yo Kenskòf. Pami viktim yo genyen 3 sòlda Fòs lame Ayiti a ki pa idantifye, yon polisye Kenyan ak plizyè polisye epi sòlda ki te sòti blese pandan jou pase yo.
Atik sa se pwopriyete prive ©️ Gwoup Medya MAGHAITI 2025
