Sekretè Deta ameriken an, Anthony Blinken anonse ayè jedi 5 septanm 2024 la, 45 milyon èd imanitè pou Ayiti. Responsab ameriken an fè anons sa nan yon konferans pou laprès li te bay nan ayewopò Tousen Louvèti a, nan kad rankont li vin fè ak divès chèf nan peyi a.
“Sa vle di ap gen plis manje, plis dlo, plis asenisman, plis sèvis sante ak plis èd pou yon milyon edmi ayisyen anplis“, daprè deklarasyon diplomat la ki pèsiste pou di Etazini se pi gwo soutyen Ayiti nan zafè èd imanitè. Puiske, li soulinye èd sa ap fè yo plis pase 210 milyon yo pral bay pou misyon an.
Pi lwen, li fè konnen peyi l la aktyèlman ap travay nan tèt kole ak otorite ayisyen yo nan lide pou mete Ayiti sou chimen devlopman an. Se pou sa, li site faktori yo ki reprezante 90 % nan ekspòtasyon rad epi nan bay ayisyen travay.
Pou sa ki konsène fòs miltinasyonal la, Anthony Blinken soulinye Jamayik angaje l menm jan ak Salvadò, ki ap voye yon ekip medikal, pou ede konbat bandi yo. Yon lòt bò, li eksplike nan moman kritik sa se lajan ak plis pèsonèl yo bezwen pou kenbe objektif misyon an.
Pou kounye a, chèf ameriken an anonse nan kèk semèn ankò ap gen gwo asanble jeneral nan Nasyonzini. Se la tou, li fè konnen li ap konvoke yon reyinyon ministeryèl pou diskite sou tout pwoblèm Ayiti yo, epi pwofite renouvle manda Misyon Sekirite ak Soutyen(MSS) an ki selon li menm ta dwe bout nan mwa oktòb k ap vini la.
Atik sa se pwopriyete prive ©️ Gwoup Medya MAGHAITI 2024
