Ansyen Premye minis Garry Conille resi reyaji an piblik aprè Konsèy Prezidansyèl Tranzisyon an (KPT) te deside revoke li a. Nan sans sa, nan yon mesaj li pibliye sou kont X li maten madi 12 novanm 2024 la, ansyen chèf la swete reyisit pou nouvo Premye minis Alix Didier Fils-Aimé ki apèn pran fonksyon an.
«M pran nòt sou nominasyon sitwayen Alix Didier Fils-Aimé kòm Premye minis Repiblik Ayiti a, mwen voye ba li swè reyisit mwen nan akonplisman misyon li», daprè sa nou li sou kont X ansyen PM Garry Conille.
Menmsi ofinal li pa t fè tèt di pou te aksepte ak desizyon KPT a, e menm ta rive remèt tout materyèl leta li t ap jui yo, n ap soulinye nan kòmansman sa pa t parèt konsa nan lèt korespondans li te voye bay Konsèy la.
Nan menm demach reziyasyon sa, ansyen direktè rejyonal Fon Nasyonzini pou Timoun (UNICEF) voye yon mesaj klè pou tout aktè politik peyi a. Se sa ki fè li deklare : «Nan moman nou ye la, linyon ak solidarite se yo ki pi enpòtan pou peyi a».
N ap raple, Garry Conille gen 58 lane li te premye minis Ayiti nan lane 2011-2012 sou gouvènman Michel Martelly a, pou ane 2024 la ankò li te tounen nan pòs sa kote li fè 5 mwa kòm chèf gouvènman an. Anplis sa li te kòdonatè rezidan Nasyonzini ak kòdonatè imanitè nan peyi Nijè nan lane 2011, li te reprezantan adjwen Ayiti nan Fon Nasyonzini pou Popilasyon (UNFPA), li te konseye teknik prensipal pou Afrik. Epi li se doktè nan zafè medsin e li te direktè rejyonal UNICEF pou Amerik latine nan ak Karayib la.
Atik sa se pwopriyete prive ©️ Gwoup Medya MAGHAITI 2024
