183 ayisyen ki t ap tante antre Etazini sou bato tounen nan peyi yo a jounen mèkredi 21 dawout 2024 la.
Se gad kòt ameriken ki voye moun sa yo tounen Ayiti pandan yo te prèske rive sou kanal Povidensyal. Yo te kite peyi a 16 dawout pase a kote yo te anbake nan komin Obòy nan depatman Nò.
Pami 183 migran sa yo nou jwenn 32 fanm, 145 gason, yon ti bebe ak 5 timoun, daprè pawòl Kerwin Augustin ki se responsab Òganizasyon Entènasyonal Migrasyon (OIM) nan depatman Nò a. Puiske se li menm ki t ap resevwa moun sa yo.
Kerwin Augustin bay enpresyon l sou sak rive a. Se sa k fè li mande ak sitwayen ayisyen yo pou yo fòse otorite yo kreye bon kondisyon lavi yon fason pou yo menm yo ka rete viv lakay yo.
Pandantan sa, li pwofite konseye moun yo pou yo pa mete lavi yo an danje sou dlo, nan fè vwayaj an kachèt sa yo.
Malgre vwayaj sa yo toujou gen gwo konsekans sou lavi divès Ayisyen, sa pa anpeche yo kontinye riske vi yo ak sèl objektif pou kite peyi a.
Atik sa se pwopriyete prive ©️ Gwoup Medya MAGHAITI 2024
