Ayè lendi 18 novanm nan ki te make 221 lane batay Vètyè e ki te jou lame a tou, Konsèy Prezidansyèl Tranzisyon an (KPT) ak gouvènman an inogire nouvo baz Fòs Lame Ayiti(FAD’H). Espas sa pote non «baz Vètyè», li chita kò li nan Taba.
«Pwojè sa jwenn sous li nan 5 pilye enpòtan nan akò 3 avril 2024 la pou yon tranzisyon poze sa ki vle di pou n tabli sekirite. Seremoni sa ki make kote nou remèt wo eta majò lame Ayiti a se yon etap enpòtan nan plan ranfòsman ak modènizasyon FAD’H la», daprè deklarasyon sikonstans Prezidan Konsèy la, Leslie Voltaire.
Selon detay reprezantan Lavalas la, baz sa konstui sou plis pase 10 kawo tè, li kapab resevwa plis pase 2 000 sòlda e elikoptè ka desann ladan l tou. Nan diskou li a, li te fè konprann lame a ap la pou l ede nan rekonstriksyon peyi a ak ede jwenn yon 2yèm endepandans pou Ayiti.
Yon lòt kote, Kòmandan an chèf lame a, Derby Guerrier te pran lapawòl tou e mande pou chak sòlda mete plis fòs nan yo pou kapab fè Ayiti peyi tout Ayisyen swete a. Tout sa se ap pandan lespri zansèt yo ap rete kòm sous enspirasyon yo pou kontinye batay pou pèp la.
N ap soulinye pandan gwo chèf yo te nan seremoni sa, nèg ak zam te kontinye fè vyolans keseswa toupre baz la ak divès zòn nan Dèlma. Nan Kafou Ayewopò, bandi yo te menm rive mete dife nan plizyè biznis ki sou wout la.
Atik sa se pwopriyete prive ©️ Gwoup Medya MAGHAITI 2024
