Kèk jou avan dat rantre lekòl la ki te fikse pou jounen madi premye oktòb la, òganis k ap defann dwa timoun yo fondasyon «Zanmi Timoun» nan yon nòt pou laprès di l eksprime enkyetid li genyen pou kòmansman ane eskolè 2024-2025 lan. Puiske yo soulinye ka plizyè santèn timoun ki ap viv kounye a nan kan moun ki deplase yo.
Nan nòt sa ki pote dat 27 septanm pase a, estrikti a fè konnen timoun sa yo k ap viv nan kan yo derasinen akoz vyolans ak ensekirite a ki blayi toupatou. Sa ki fè yo pa gen aksè ak dwa fondamantal yo nan zafè edikasyon ak jui yon anviwònman ki favorab pou devlopman yo ta dwe genyen.
Òganizasyon a nan nòt la pale de moman aktyèl la ki sitou gen yon kriz imanitè san parèy. Sitiyasyon sa a daprè yo vin antrave pi plis sitiyasyon timoun ki deplase yo, ki pa sèlman soufri akoz yo pèdi kay yo, men tou yo manke jwenn edikasyon. «Pandan kòmansman ane lekòl la ta dwe gen yon tan pou espwa ak renouvèlman, timoun sa yo fè fas ak yon avni ki pa asire, san resous ase pou yo entegre sistèm edikasyon an», se sa fondasyon an ekri.
Òganis dwa timoun nan ki montre jan l preyokipe fas ak sitiyasyon kritik sa, mande otorite yo nan leta a pou yo respekte dwa timoun sa yo. Yon lòt kote, fondasyon an soulinye jan li enpòtan pou gouvènman ayisyen an kolaborasyon ak òganizasyon entènasyonal ak lokal yo. Yon fason k ap pèmèt yo poze aksyon rapid pou asire timoun sa yo moso edikasyon.
Anplis sa a, òganizasyon an kwè sèl fason pou timoun yo tounen lekòl se : mete kanpe yon lekòl tanporè, pèmèt gen founiti eskolè ak kreye yon espas sekirize yo pou yo. Paske se sa yo ki selon yo menm nesesè pou pèmèt timoun sa yo retounen lekòl.
N ap raple, se jodi madi premye oktòb la menm Ministè Edikasyon Nasyonal ak Fòmasyon Pwofesyonèl te tanmen rantre ofisyèl ane eskolè 2024-2025 la, nan depatman Sid peyi a. Fòk nou di, malgre sitiyasyon sekiritè peyi a, divès elèv te pran chimen lekòl nan divès zòn sitou nan Laplèn.
Atik sa se pwopriyete prive ©️ Gwoup Medya MAGHAITI 2024
