Nan yon nòt yo pibliye jodi madi 18 fevriye 2025 lan, Fondasyon Zanmi Timoun kondane zak ansasinay ki fèt sou plis pase yon dizèn timoun Kenskòf. An menm tan, responsab yo eksprime endiyasyon yo fas ak lanmò ti bebe Eliana Télémaque la ki te fèt semèn pase a.
«Fondasyon Zanmi Timoun eksprime gwo doulè l fas ak ansasinay plis pase yon dizèn timoun, ladan yo yon ti bebe 2 mwa Kenskòf», se sa nou li nan nòt Fondasyon an sòti a. Yo fè konnen zak sa se yon zak kriyèl ki montre nan ki nivo kriz sekiritè a menase tout bon lavi moun nan peyi a.
Pi lwen, yo soulinye yo menm ki la pou defann dwa timoun yo, mande pou otorite yo fè kou yo konnen pou pran divès mezi pou jwenn responsab krim sa yo epi trennen yo lajistis. Yo kontinye pou di, ansasinay timoun san defans se yon zak vyolasyon dwa epi yon krim kont limanite ki pa dwe rete san sanksyon.
Pou jistifye demann yo a, yo site plizyè enstriman entènasyonal tankou Konvansyon ki lye ak Dwa Timoun (CDE) nan Nasyonzini (1989), Ayiti te ratifye nan lane 1994. Lwa sa yo oblije leta garanti lavi ak devlopman timoun yo, epi pwoteje yo kònt tout fòm vyolans.
Pou fini, responsab yo mande pou kominote nasyonal ak entènasyonal la pou kontinye fè jefò pou pwoteje timoun ayisyen yo epi garanti dwa yo genyen pou yo viv san kè sote, ak tout diyite. Fondasyon Zanmi Timoun pwofite nòt sa pou voye solidarite l bay tout fanmi ki viktim nan vyolans ki nan peyi a.
Atik sa se pwopriyete prive © Gwoup Medya MAGHAITI 2025
