Yon jou avan dat ki make jounen entènasyonal lapè a, fondasyon « Zanmi Timoun » sòti yon nòt jounen vandredi 20 septanm 2024 la pou mande Leta aji kont vyolans sa ki chita kò l nan sosyete ayisyèn nan, kote timoun yo pa epanye.
«Zak vyolans ak zam ki gen nan peyi a deja lakoz lanmò plizyè milye ayisyen pami yo timoun epi l fòse plizyè milye lòt kouri kite kay yo pou ale nan sit kote kondisyon yo pa bon pou moun viv. Sitiyasyon sa fè popilasyon an kontinye paka jwi dwa fondamantal li yo», se sa nou li nan nòt la.
Òganis dwa moun nan ki site reprezantan Wo Komisarya Nasyonzini an, kontinye pou eksplike gen anviwon 2 505 moun nèg ak zam touye, ladan yo gen sa ki sòti blese tou.
Nan sans sa, fondasyon «Zanmi Timoun» mande ak leta ayisyen pou l respekte angajman l. Yo konseye pi wo yo nan leta a pou mete mwayen disponib pou ede timoun ki nan sitiyasyon difisil yo, epi pou pran responsablite yo pou garanti sekirite tout popilasyon an. Pandan yo ap travay sannpran souf pou bay yon repons ak bandi yo k ap teworize pèp la.
Yon lòt bò, Òganis k ap defann dwa timoun yo nan peyi a nan okazyon jounen entènasyonal pou lapè a eksprime preyokipasyon yo genyen pou popilasyon ayisyèn nan, kote gang yo pa sispann teworize yo depi kèk ane. Se yon bann zak, daprè fondasyon an, ki fet anba je gouvènman nan pouvwa defakto a.
Se pou sa, òganizasyon sa k ap defann dwa timoun yo mande ak otorite ayisyen yo pou yo pran tout mezi nesesè yon mannyè pou yo retabli lapè ak sekirite nan peyi a. Tout sa ap fèt, yon fason pou kapab garanti bon fonksyonnman sosyete a nan lide pou timoun yo ka evolye nan pi bon anviwonnman.
Nan nòt sa tou, responsab yo fè konnen depi kèk ane popilasyon ayisyèn nan ap konnen yon klima ki destabilize jounen abitan yo ki nan kapital la ak nan kèk vil pwovens. Mete sou sa yo, genyen masak, ansasinay, kidnaping, vyòl ak piyaj popilasyon an ap sibi. E malgre sa yo soulinye abitan yo pa konnen kilès pou yo pote plent, pwiske otorite yo pran anpil tan pou kanpe soufrans y ap andire yo.
Jounen entènasyonal Lapè ane sa ap fete anba tèm «Ankouraje yon kilti lapè». Se yon jounen refleksyon Òganizasyon Nasyonzini (ONU) ap fè depi 43 lane, nan lide pou kontinye fè pwomosyon pou yon mond nan lapè.
Atik sa se pwopriyete prive ©️ Gwoup Medya MAGHAITI 2024
