Nan yon kominike pou laprès yo pibliye Jodi mèkredi 20 novanm 2024 la, Fondasyon Ayiti Jazz anonse li repòte 18yèm edisyon Festival PAPJazz la. Nan eksplikasyon li bay yo, li fè konprann se akoz sitiyasyon sekiritè Ayiti a vin pi mal anplis konpayi ayeryen yo ki kanpe vòl yo sou peyi a ki fè yo pran desizyon sa a.
«Fondasyon Ayiti Jazz oblije repòte 18yèm edisyon Festival PAP Jazz, Festival Entènasyonal Jazz nan Pòtoprens, ki te gen pou l te fèt sòti 15 pou te rive 19 janvye 2025 lan», daprè sa ki ekri nan kominike sa ekriven Marc Sony Ricot siyen an.
Pou sa ki gen pou wè ak dat gwo evènman mizik sa ta dwe fèt la, responsab yo fè konprann poko gen okenn lòt dat ki pwograme. Men, yo presize sa ap fèt se aprè sitiyasyon peyi a vin miyò epi pou konpayi ayeryen yo ta kominike plan vòl yo ap gen sou Ayiti yo.
Nan pwograsyon yo te fè pou janvye k ap vini la, yo fè konprann te genyen mizisyen/atis ki t ap sòti Etazini, Chili, Gwadloup, Kolonbi, Meksik ak lòt ankò. Puiske festival sa se yon evènman entènasyonal kote plizyè atis lòt nasyon konn vin pou jwe mizik an Ayiti.
N ap raple, se pou menm rezon ensekirite nan Pòtoprens lan òganizatè yo te al fè 16yèm edisyon festival la nan vil Okap. Alòske, malgre tout panik 17yèm edisyon an te fèt kanmenm nan kapital la espesyalman nan otèl Karibe Convention Center sòti 25 pou te rive 28 janvye 2024 la.
Atik sa se pwopriyete prive ©️ Gwoup Medya MAGHAITI 2024
