Nan yon nòt pou laprès yo sòti ayè mèkredi 4 septanm 2024 la, estaf ki abitye travay ak atis Mechans-T a mande pou leta ayisyen rejwenn yo pou kapab kontinye rechèch yo. Yo fè demann sa egzakteman 2 mwa aprè pèsonn pa janm wè atis la aprè yon pwogram li t al jwe Bayamas.
Daprè sa moun k ap jere dosye sa ekri, yo fè konnen yo fè plizyè demach pou te kapab lokalize Wens Jonathan Désir tout moun konnen sou non Mechans-T. Men jouskounye a, anyen poko fèt si nou kwè sa yo deklare yo. E se sa ki fè, yo soulinye yo te menm fe demach bò kote otorite ayisyen yo nan lide pou te voye yon ekip Bayamas pou te konnen sa ki pase a, men malgre sa yo di yo poko jwenn okenn repons.
«Yon petisyon te siyen pa plis pase 100 moun ki gen ladan fanmi, zanmi ak sipòte. Yo te soumèt bay Ministè Afè Etranjè ayisyen an Ministè Kilti, pou mande otorite yo voye yon gwoup travay pou ede ofisyèl Bahamas yo», selon eksplikasyon yo bay.
Se pou tèt sa, yo mande pou otorite ayisyen yo rekonèt nivo ijans ki genyen pou yo chache jwenn kote atis la twouve l. Nan sans sa, yo deklare se tout kominote a ki mete konfyans yo nan asistans yo ta dwe bay Mechans-T a.
N ap soulinye, yo fè kwè yo te gentan pran plizyè inisyativ tankou: depoze rapò nan lapolis Royal Bayamas la, nan DCPJ, nan gad kot ameriken an. Yon lòt bò, yo asire yo chache asistans kongrè ameriken an epi toujou kolabore ak otorite Bayamas yo ak Etazini.
Nan menm nòt sa, yo raple Mechans-T se papa 3 timoun, ki depi 4 jiyè pase a kite fanmi, zanmi ak fanatik li yo nan gwo lapèn
Atik sa se pwopriyete prive ©️ Gwoup Medya MAGHAITI 2024
