Jounen mèkredi 25 septanm 2024 la, depatman trezò ameriken an sanksyone ansyen depite Latibonit la, Prophane Victor dèske li fòme, sipòte, epi bay gang, ki komèt gwo vyolasyon dwa moun an Ayiti, zam.
Nan yon kominike li rann piblik jodi mekredi a, Etazini enfòme li sanksyone ansyen palmantè ayisyen an, Prophane Victor ak aktyèl chèf gang Gran Grif la, Luckson Elan.
Etazini anonse li pran sanksyon kont ansyen depite Latibonit la pou gwo wòl li jwe nan fòme, sipòte, epi ame gang yo. Yon lòt bò, li fè konnen chèf gang Gran Grif la, Luckson Elan, tonbe anba sanksyon yoli menm pou patisipasyon li nan gwo vyolasyon sou dwa moun atravè aktivite gang nan depatman Latibonit.
«Tou 2 moun sa yo, Victor ak Elan, gen non yo site nan dènye rapò final Komite Ekspè Nasyonzini an kòm moun ki gen gwo reskonsabilite nan kriz sa k ap ravaje Ayiti a», se sa nou li nan kominike a. Pi lwen, yo soulinye nivo vyolans ak mechanste gang yo montre nan vyole dwa moun yo se yon bagay san parèy, nan atak yo toujou mennen san pitye kont popilasyon an epi nan fason y ap anpeche asistans imanitè rive jwenn moun ki nan bezwen.
Daprè kominike a, vyolans ak vyòl ki baze sou jan, an patikilye vin youn nan ekspresyon vyolans ki pi terib gang yo itilize pandan 2 lane ki sot pase la yo. Yo fè konnen pwomosyon responsablite pou vyolans ki baze sou jan se youn nan pi gwo priyorite gouvènman ameriken an nan kad jefò y ap fè pou yo aplike pwogram sanksyon Global Magnitsky a.
© Tous droits réservés – Groupe Média MAGHAITI 2024
