Fas ak tout sitiyayon y ap andire nan Gran Sid peyi a, estrikti ki pote non “Nou Bouke Tann“ nan leve vwa li pou gouvènman Garrry Conille an ansanm ak Konsèy Prezidansyèl Tranzisyon an (KPT) tande revandikasyon yo.
Nan yon nòt pou laprès ki gen dat jedi 12 septanm 2024 la, estrikti a mande otorite k ap jere tranzisyon an pou yo tande kri moun Gran Sid k ap soufri depi aprè siklòn Matye ak tranblemantè 2021 an.
Anplis pwoblèm sa yo moun nan Gran Sid peyi a ap rankontre, “Nou Bouke Tann“ fè konnen tou depi anviwon 3 lane gang ap fè lalwa, sa ki lakoz yo bloke wout yo epi teworize popilasyon an.
Se sa ki fè òganizasyon an di li bouke tann pwomès nan bidjè ki pa janm respekte. Pandantan sa, li mande pou gouvènman an mete moun Gran Sid yo an priyorite nan bidjè 2024-2025 lan.
Daprè pwopozisyon yo fè yo, gouvènman an ta dwe konplete ede yo nan jwenn 50 kawo tè pou Ayewopò Antoine Simon ka vin entènasyonal, asire konstriksyon ak operasyon yon ayewopò ki nesesè pou kwasans ak devlopman rejyonal. Yon lòt bò, yo mande pou gen amelyorasyon nan pò kabotaj Jeremi, Jakmèl, Miragwàn ak Okay pou fasilite sikilasyon moun ak machandiz nan Gran Sid ak lòt rejyon nan peyi a.
Pou fini, yo mande gouvènman an bay otorizasyon pou pò entènasyonal nan Senlwi a kapab fonksyone. Paske daprè konsiderasyon yo antre nan demach sa se rive nan yon etap kle pou fasilite echanj entènasyonal ak amelyore koneksyon ak lòt pati nan peyi a.
Atik sa se pwopriyete prive ©️ Gwoup Medya MAGHAITI 2024
