Emmanuel Charles tout moun nan Wanament konnen sou non Manno mouri ayè dimanch 3 novanm 2024 la. Selon plizyè medya rejyonal, mesye Charles te fè anpil tan malad avan l rive pèdi lavi l.
«Malad mwen an se pa t yon maladi konsa konsa», se te deklarasyon viktim nan nan mwa avril 2024 aprè tout moun te aprann li malad grav. Nan menm moman sa, li te fè konprann se anpil gwo tèt ki te dèyè fini ak lavi li. Se sa ki fè, avèk anons lanmò Manno popilasyon an pa sispann poze tèt yo kesyon sou kisa ak kilès ki ta enplike nan zak sa yo di ki ta gen mistik ladan li.
Emmanuel Charles te youn nan moun ki te pi angaje nan pwojè konstriksyon kanal la. Kote li te konn defann koz Ayisyen yo devan dominiken. Li te menm dakò pou fwontyè nan bò pa nou an te rete fèmen lè gouvènman dominiken an te deside kanpe tout relasyon ak Ayiti, yon fason pou te kanpe kanal la nan Wanament.
Non Emmanuel Charles ajoute nan lis moun ki mouri dwòl yo aprè gwo angajman yo te pran pou sèvi peyi a nan pwojè Kanal Rezistans lan. Milourie Sylfrard fanm kanal la, ak Adolph Francky moun te konnen kòm Felando Kanaldo se 2 lòt pèsonalite ki te deja pèdi lavi yo.
Fòk nou di fas ak tout ka lanmò sispèk sa yo, plizyè moun nan sosyete a leve vwa yo pou mande otorite nan peyi a pou mennen ankèt pou konnen vre rezon lanmò moun sa yo nan Wanament.
Atik sa se pwopriyete prive ©️ Gwoup Medya MAGHAITI 2024
