Nan yon entèvansyon li fè jodi lendi 25 novanm 2024 la sou Radyo Televizyon Karayib, jounalis Guerrier Henry deklare emisyon «Boukante La Pawòl» li anime sou Radyo Méga FM nan pap kanpe. Pou defann li, jounalis la fè konnen emisyon li an pa t janm ap fè pwopagann pou bandi jan Ògan Egzekitif Konsèy Nasyonal Telekominikasyon (KONATEL) te di li nan lèt yo te voye bay responsab Radyo sa a.
«Mwen vle di ni KONATEL ni KPT a emisyon «Boukante La Pawòl» pap kanpe. L ap kontinye», se deklarasyon sa pwofesyonèl laprès la deklare pandan li di li kwè desizyon sa ki pran an se zafè politik k ap regle.
Se pou sa jounalis la anonse, emisyon sa ap kontinye pase sou antèn Radyo Méga FM nòmalman. Li fè konprann, pou emisyon sa a ta kanpe jan KONATEL te mande li a fòk leta ta anonse asosiyasyon medya yo ak jounalis yo nan kad sekirite nasyonal la li mete restriksyon sou chèf gang ki pa ta dwe pale nan medya yo.
Nan menm sans sa, genyen tou Joseph Guyler C Delva nan non SOS Jounalis ki mande pou gouvènman an kanpe sou desizyon sa. Osnon nan jou k ap vini yo, li menase yo menm nan estrikti sa yo ap pran kèk inisyativ kont desizyon sa a ki ilegal e ki vle anpeche laprès pale anba demokrasi a.
N ap raple, depi vandredi ki te 22 novanm nan KONATEL te mande pou Alex Saint-Surin kanpe emisyon Boukante La Pawòl sou Radyo li a. Desizyon sa pran nan kad eta ijans gouvènman an pran sitou pou sekirite nasyonal la, kote ògan k ap met kontwòl sou telekominikasyon peyi a te fè konprann emisyon sa ap plede fè pwopagann pou bandi yo.
Atik sa se pwopriyete prive ©️ Gwoup Medya MAGHAITI 2024
