Aprè 4 mwa kanpay sere sere kont kandida demokràt la, Kamala Harris, ofinal se Repibliken an, Donald Trump ki genyen eleksyon 2024 yo Etazini. Selon CNN, nan bilten vòt eleksyon sa ki fèt ayè madi 5 novanm nan, Donald Trump aktyèlman avèk 276 vòt pou gran elektè yo, alòske advèsè li a ak sèlman 223.
«Mwen vle remèsye pèp ameriken an pou lonè san parèy sa kote m sòti 47yèm ak 45yèm prezidan», se deklarasyon nouvo chèf ameriken an jounal CNN rapòte.
276 gran elektè Trump yo reprezante 71 082 462 vòt (51 % vòt popilè a). 223 pa Harris yo bay 65 991 011 vòt ki egal ak 47.3 vòt popilè a.
Daprè CNEWS, men kòman gran elektè ki chwazi Trump yo reprezante : 9 nan Alabama, 6 nan Akanzas, 16 nan Kawolin Nò, 9 nan Kawolin Sid, 3 nan Dakota Sid epi 3 nan Nò a, 30 nan Florid, 16 nan Jòji, 4 nan Idawo, 11 nan Endyana, 6 nan Lowa, 6 nan Kanzas, 8 nan kentouki, 8 nan Luizyàn, 6 nan Misisipi, 10 nan Misouri, 4 nan Montana, 4 nan Nebraska, 17 nan Owayo, 7 nan Oklawoma, 19 nan Pensilvani, 11 nan Tennessee, 40 nan Tekzas, 16 nan Outa, 4 nan Vijini-Oksidantal, 10 nan Wiskonsen, epi 3 nan Wyoming.
Pou Kamala Harris, men kòman sa ye pou gran elektè yo : 54 pou eta Kalifòni, 10 pou Kolorado, 3 nan Delaware, 3 nan District of Columbia, 4 nan Hawaï, 19 nan Ilinwa, 10 nan Mariland, 11 nan Masachousèts, 10 nan Minesota, youn nan Nebraska, 4 nan New Hampshire, 28 nan New York, 14 nan New Jersey, 5 nan Nouvo-Meksik, 8 nan Oregon, 4 nan Rhode Island, 3 nan Vèmon, 13 nan Vijini, ak 12 nan Washington.
Kòm Repibliken an depase chif gran elektè (270) ki pou fè l prezidan Etazini an, se sa ki fè anpil medya entènasyonal konsidere pou kounye a li difisil pou Kamala Harris ta rejwenn li nan kous la. Kidonk, tout rezilta sa yo se chif pwovizwa avan menm responsab yo kominike chif ofisyèl yo.
N ap soulinye, plizyè gwo chèf nan plizyè peyi gentan salye viktwa Trump lan, e swete yo pral travay ansanm menm jan yo te fè l sou manda li te gen avan Joe Biden nan. Pami moun sa yo nou jwenn, Prezidan fransè a, Emmanuel Macron, premye minis izrayelyen an, Benjamin Netanyahu, ak Chanselye Alman an, Olaf Scholz.
Kredi foto : Angela Weiss /AFP / Getty lmages
Atik sa se pwopriyete prive ©️ Gwoup Medya MAGHAITI 2024
