Aprè rezistans li t ap fè pou l pa t kite pòs li, madanm Dijna Guillet Delatour resi deside remèt demisyone li antanke kòdonatris jeneral Pwogram Nasyonal Kantin Eskolè (PNCS). Li pran desizyon sa nan yon lèt li voye bay minis edikasyon an, Augustin Antoine jodi samdi 16 novanm 2024 la.
«Nan lèt sa, mwen vle tout prezante demisyon m nan pòs kòdonatris jeneral Pwogram Nasyonal Kantin Eskolè (PNCS). Depi w fin resevwa lèt sa sa vle di m tou demisyone», daprè sa nou li nan korespondans sa ki pote siyati enfimyè a.
Konsa tou, li te pwofite okazyon an pou felisite minis lan dèske li toujou rete nan plas li aprè fòmasyon nouvo gouvènman ki apènn fòme sou lòd premye minis Alix Didier Fils-Aimé.
N ap fè konnen, avan ansyen kòdonatris la te pran desizyon sa te gen gwo mouvman nan lokal PNCS la lendi ki te 11 novanm pase a. Anplwaye yo te rive fèmen biwo a nan lide pou te anpeche enstalasyon nouvo kòdonatè a, Kevenot Dorvil. Se yon aksyon ki poutan pa t anpeche seremoni sa fèt, puiske minis lan te enstale mesye Dorvil nan nouvo pòs li depi menm jou lendi a.
Se pou tèt sa aprè plizyè jou revokasyon li an, direktè jeneral Ministè Edikasyon Nasyonal ak Fòmasyon Pwofesyonèl la (MENFP) te oblije voye yon korespondans pou li. Ladan l li te mande l pou l remèt leta tout dosye ak materyèl ki nan men li yo.
Regwoupman Anseyan pou Defans Refòm Sistèm Edikatif Ayisyen an (REDRESEH) nan bò pa li pa t mete dlo nan bouch li pou kritike fason madanm Delatour te dirije bwàt la.
Dezisyon yo te pran ant yo menm sèlman, li pa t vle rann kont ak pèsonn keseswa sou lajan oubyen kòman distribisyon manje nan lekòl yo konn ye, li derefize bay plas li a, se pami sa estrikti a te repwoche ansyen chèf PNCS la nan yon lèt denonsiyasyon ki te pibliye vandredi 15 novanm nan.
N ap raple, nan lane 2021 ansyen kòdonatris la te gen menm ajisman an, kote li pa t kite plas sa pou jounalis Nancy Lainé. Malgre otorite yo te nonmen l nan dat 12 dawout ane 2021 an.
Atik sa se pwopriyete prive ©️ Gwoup Medya MAGHAITI 2024
