Aprè mèt otèl Kaliko Beach la, Emmanuel Fritz Paret te fè kwè Digicel dwe li plis pase 2.5 milyon dola, konpayi a deside reyaji pou di li pa dwe pèsonn lajan. Tandiske se yon pwoblèm ki fè konpayi telefonik la paka bay kliyan l yo sèvis entènèt depi samdi 14 septanm 2024 la akoz kab li pase nan otèl «Kaliko Beach Club» la ki andomaje.
Nan yon kominike li pibliye jodi lendi 16 septanm 2024 la, Digicel fè konnen li pa dwe Emmanuel Fritz Paret ki se mèt otèl Kaliko Beach la yon pyas jan li te fè kwè l la. Daprè sa yo eksplike, gen yon aksyon legal k ap tann depi lane 2021 sou dosye sa, men tribinal poko janm bay desizyon sou li.
Nan sans sa, responsab konpayi a kwè pandan y ap tann jijman ki ta dwe fèt la «Paret Hospitality Group S.A.» li menm paka nan bò pa li ap mande konpansasyon finansye. Se pou sa, Digicel di li regrèt konpòtman mesye Paret la, paske li soulinye se sitwayen an poukont li ki deside bloke aksè kominikasyon ak tout yon popilasyon, sitou nan kontèks ensekirite nou ye a.
Pi lwen, konpayi a te pwofite raple mèt otèl Kaliko Beach la se tout itilazatè nan peyi a ki nan soufrans akoz pàn kab sa a. Se pou sa, li di l swete mesye Paret pote solidarite l ak sitwayen yo.
Pou sa ki konsène akizasyon lyen ak gang ki te pote sou responsab Digicel yo, yo fè konnen yo pran nòt sou kanpay difamasyon mesye Fritz Emmanuel Paret fè yo. E anonse yo ap rezève dwa yo pou pran aksyon legal kont akizasyon ki fèt yo.
N ap fè soulinye, menm jan direktè jeneral yo a, Jean Philippe Brun te anonse l pandan wikenn pase a se konsa tou konpayi a efektivman enfòme piblik la li gen yon kab « Cable and Wireless » anba dlo ki pase nan espas otèl «Kaliko Beach Club» ki tonbe an pàn. Sepandan yo soulinye malgre tout jefò yo fè teknisyen yo poko rive jwenn otorizasyon dirijan otèl la. Yon sitiyasyon ki fè jouskaprezan popilasyon an toujou paka jwenn sèvis entènèt.
Atik sa se pwopriyete prive ©️ Gwoup Medya MAGHAITI 2024
