Nan yon kominike pou laprès yo pibliye jodi madi 12 novanm 2024 la, Pòt pawòl Depatman Deta ameriken an, Matthew Miller mande pou manm Konsèy Prezidansyèl Tranzisyon an (KPT) pran responsabilite yo devan popilasyon an ak kominote entènasyonal la. Yo mande tou pou gouvènman tranzisyon an sispann ak zafè enterè pèsonèl k ap regle a.
«Li enpòtan tou pou ankouraje moun pran responsabilite yo andedan KPT a pou kenbe kredibilite yo devan pèp ayisyen an ak kominote entènasyonal la. Bezwen enpòtan ak imedya pèp ayisyen yo egzije pou gouvènman tranzisyon an bay priyorite a bòn gouvènans olye enterè pèsonèl aktè politik yo», se sa Matthew Miller deklare.
Yon lòt kote, responsab la mande pou KPT a ak tout nouvo gouvènman an pou pibliye plan aksyon yo k ap bay vizyon yo pou amelyore sekirite, gouvènans epi reyalize eleksyon nan peyi a. Se pou sa, Depatman Deta a fè kwè li enpòtan anpil pou chak aktè sa yo defini wòl ak responsabilite Konsèy la genyen anvè nouvo Premye minis lan.
Nan kominike sa, sitwayen ameriken an konseye 2 pati sa yo pou mete sou pye kèk mezi. Sa ki selon li menm ap fè youn kenbe lòt responsab pou zak yo, pandan y ap evite youn bloke lòt.
Nan sa ki gen pou wè ak nominasyon epi enstalasyon Alix Didier Fils-Aimé kòm nouvo chèf gouvènman ayisyen an, li mansyone Etazini rekonèt pa t gen bon jan avansman avèk ansyen PM Garry Conille. Men, kounye a la yo swete travay ansanm ak nouvo Premye minis lan nan tèt kole ak KPT a yon fason pou reyalize priyorite ijan yo nan mwa k ap vini yo.
CP: Daily Sabah
Atik sa se pwopriyete prive ©️ Gwoup Medya MAGHAITI 2024
