Nan yon kominike li pibliye jounen vandredi 17 janvye 2025 lan, Fon Nasyonzini pou Timoun (UNICEF) fè konnen yon timoun sou chak 8 lòt nan peyi a kouri akoz zak bandi yo.
Nan kominike sa òganizasyon entènasyonal la pibliye a, li fè konprann plis pase yon demi milyon timoun deplase an Ayiti, sa ki bay yon ogmantasyon 48% depi septanm 2024. Nou li tou nan kominike a, UNICEF soulinye kantite timoun k ap fè eksperyans deplasman entèn nan peyi a ogmante ak prèske 50% depi septanm akòz vyolans gwoup gang yo kontinye ap fè a. Sa ki bay anviwon youn sou chak 8 timoun nan peyi a.
Pi lwen, ajans onizyèn nan fè kwè daprè dènye estimasyon yo, kounye a se plis pase yon milyon moun ki deplase nan peyi a, e mwatye ladan yo se timoun ki bezwen asistans imanitè prese prese.
Selon direktris egzekitif UNICEF la, Catherine Russell, sitiyasyon an terib pou timoun an Ayiti. E lavi yo chavire plis ak vyolans sa k ap fòse plis timoun ak fanmi yo kite kay yo a. Li mansyone yon lòt kote, timoun yo nan gwo bezwen sekiritè, pwoteksyon ak aksè nan sèvis esansyèl yo. «Nou pa ka fèmen je sou sitiyasyon yo», se sa li deklare.
Nan konimike sa, UNICEF pale sou sitiyasyon kèk timoun ki antre nan bandi akoz yo pa jwenn pwoteksyon ak aksè ki pou pèmèt yo kontinye viv. Li kontinye pou l mete aksan sou twoub politik yo peyi a ap konnen pandan dènye ane sa yo ansanm ak yon anviwonman povrete ak inegalite ki fè vin gen plis gwoup gang.
Yo di tou, timoun yo reprezante 50 pousan nan gwoup ak zam yo, puiske rekritman yo nan baz gang yo pandan ane 2024 la pase jiska 70 pousan. Se sa ki fè, òganizasyon an di li konsidere rekritman ak itilizasyon timoun yo kòm yon vyolasyon grav dwa yo ak lwa entènasyonal yo.
Pou fini, òganis lan deklare timoun ak adolesan ki deplase nan peyi a gen plis chans pou yo fè vyolans. Tankou vyolans seksyèl, eksplwatasyon ak abi kote ka zak sa yo ogmante a 1 000 pandan ane ki sot pase a.
Atik sa se pwopriyete prive ©️ Gwoup Medya MAGHAITI 2025
