Nan yon rapò li pibliye jodi vandredi 27 septanm 2024 la, Wo komisarya Nasyonzini an mande otorite ayisyèn yo ak kominote entènasyonal la fè plis jefò pou pwoteje moun epi evite plis soufrans. Puiske nan sèlman 6 mwa, yo di gen pou piti 3 661 moun ki pèdi lavi yo akoz vyolans gang ak zam yo nan peyi a.
Sòti mwa janvye pou rive mwa jen 2024 la, genyen gwo vyolasyon dwa ki fèt mete sou abi gang yo fè nan kapital la, nan depatman Latibonit ak nan pati sid Lwès la ki li menm jiskounye a pa epanye anba vyolans gang yo.
Rapò a revele tou kantite viktim vyolans seksyèl yo vin pi plis nan premye mwatye ane a. Li soulinye, gang yo te kontinye sèvi ak vyolans seksyèl pou pini, epi simen laperèz nan mitan popilasyon an.
Wo komisarya Nasyonzini an fè konnen pandan peryòd la gen omwen 860 moun ki te mouri epi 393 lòt blese pandan operasyon lapolis fè nan Pòtoprens. Pami moun sa yo, yo soulinye genyen pou pi piti 36 timoun ki rive viktim. Pandantan sa, gang yo yo menm te pwofite rekrite yon gwo kantite timoun pou vin nan ekip yo, daprè sa rapo a di.
Pou sa ki gen pou wè ak depatman Latibonit, rapò a eksplike akoz vyolans bandi yo k ap ogmante nan zòn sa ki reprezante sant manje peyi a, kiltivatè yo te oblije abandone plis pase 3 000 ekta tè. Sitiyasyon sa lakoz pwodiksyon manje an Ayiti vin difisil nan yon moman kote yo estime 1.6 milyon moun nan peyi a fè fas ak ensekirite alimante grav la.
Wo komisè an, Volker Türk salye mezi ki pran yo tankou mete kanpe yon Konsèy Prezidansyèl Tranzisyon, yon nouvo gouvènman tranzisyon ak deplwaman premye kontenjan Misyon Sipò Sekirite Miltinasyonal (MMSS) la. Li deklare li kwè misyon an bezwen ekipman ak pèsonèl ki kapab konbat gang ak zam yo yon fason efikas ak dirab.
Poutèt sa, li mande otorite ayisyèn yo pou yo pran mezi solid pou ranfòse lapolis la ak lòt enstitisyon leta ki chaje ak koripsyon nan tout dimansyon sitou sistèm jistis la. Li fè demann sa a yon fason pou yo retabli règ lalwa epi asire moun ki enplike nan komisyon vyolasyon ak abi yo responsab pou aksyon yo.
Anplis sa, li mande otorite yo pou yo pwoteje timoun yo kont gang e pou yo fè jefò pou konbat vyolans seksyèl ak vyolans ki baze sou jan. Epi garanti pwoteksyon moun ki deplase yo.
Atik sa se pwopriyete prive ©️ Gwoup Medya MAGHAITI 2024
