Misyon Sekirite ak Soutyen (MSS) an rann piblik jounen madi 17 septanm 2024 la, yon nòt pou l prezante bilan travay li reyalize ansanm ak Polis Nasyonal Ayiti (PNH) a pandan 3 dènye semèn sa yo. Nan nòt sa, li fè konnen plizyè chèf gang te voye mesaje pou negosye yon trèv ak dyalòg ak gouvènman an.
Selon sa yo fè konprann Premye minis Garry Conille, direktè PNH la, Rameau Normil ak kòmandan Fòs MSS la, SAIG Godfrey Otunge te pito mande yo rann tèt yo ak depoze zam yo, epi prepare yo pou yo jije pou mechanste yo fè.
Nan nòt sila, MSS la enfòme operasyon ki fèt nan tèt ansanm ak PNH la te vize divès zòn ki anba kontwòl bandi yo. Pami zòn sa yo se Sant Vil Pòtoprens, Gantye, Dèlma, Pò APN, Kwadèboukè ak Taba. Li fè konnen tou se gras ak operasyon sa yo, plizyè barikad te rive kraze sa ki fè wout gang yo te bloke yo netwaye kounye a.
Nan detay MSS la bay, li eksplike nan menm kad operasyon sa, fòs lòd ak manm misyon an te rive kraze yon miray doub pakinn bandi nan «400 Mawozo» yo te bati sou wout nasyonal nimewo 8 la nan Kwadèboukè. Sa ki pèmèt machin ak moun sikile lib libè nan zòn nan sa nan moman sa a.
«Operasyon MSS ak PNH yo te itilize divès inite nan PNH la, ki te rive pasifye zòn kle yo, kote anpil manm gang yo te kouri chape anba lafrechè». Plizyè moun te arete epi kèk zam te sezi nan men gang yo. Pami arestasyon yo, te genyen 2 manm gang «Chen Mechan ak Pierre 6» ki toujou nan prizon an, se sa nou li nan nòt sa.
Pi lwen, responsab yo di genyen kèk nan zòn kle operasyon yo te reprann epi kenbe anba kontwòl yo. Yo soulinye yo fè patwouy yo tout sou Dèlma a espesyalman Dèlma 4, Dèlma 31 elatriye.
Nan zòn sa yo daprè sa MSS la soulinye, moun pa t ka sikile ni nan machin ni a pye. Li presize pou l di moun yo te abandone zòn sa yo epi biznis yo te fèmen tou.
Yon lòt kote Misyon Sekirite ak Soutyen an fè konnen gras ak patwouy lajounen kou lannwit li menm ak PNH la ap fè nan plizyè zòn, abitan yo kòmanse tounen an kantite. Li site Avni Christòf, Ri Kapwa, Avni Lamatinyè, Channmas, Wout Dal ak Lari Sentonore ki se zòn ki pasifye. E lavi kòmanse reprann piti piti, pandantan sa yo fè kwè anpil manm gang yo ap kouri chape paske yo pè.
Anplis zòn sa yo Misyon a di ki pasifye, li rakonte zòn alantou Akademi Polis la li menm tou pasifye. Se sa k fè plizyè santèn nouvo aspiran kapab al swiv fòmasyon.
Pou kounye a, MSS la enfòme popilasyon an sekirite se pi gwo priyorite yo nan operasyon sa. Se pou sa, yo mande koperasyon ak sipò tout moun yon fason pou bandi yo pa gen okenn opsyon sinon rann tèt yo.
Atik sa se pwopriyete prive ©️ Gwoup Medya MAGHAITI 2024
