Nan yon atik li pibliye jodi jedi 4 septanm 2024 la, jounal Miami Herald fè konnen Etazini ap chache fason pou l chanje misyon Kenya ki nan peyi a. Selon yo menm, yo responsab ameriken yo ta pito vle li nan fòm yon operasyon pou kenbe lapè pou Nasyonzini.
Nan atik sa, jounal la fè konnen plis pase 2 mwa aprè premye kontenjan polisye kenyan yo te rive an Ayiti pou dirije fòs sekirite miltinasyonal la, administrasyon Biden nan ta ap etidye posiblite pou l antre nan yon operasyon pou kenbe lapè tradisyonèl pou Nasyonzini pito.
«Depatman Deta a, ki fè fas ak yon mank finansman ak ekipman, ap analize posiblite pou transfòme sipò sekirite miltinasyonal Kenya a», se sa nou nan li atik sa.
Medya a ki site sous li, presize lejislatè ameriken yo deja enfome sou sitiyasyon sa. Li fè konnen tou, yon ofisyèl Konsèy Sekirite Nasyonal Mezon Blanch la te konfime yo ap reflechi pou chanje plan fòs la.
Pi lwen, jounal etranje a di yon lòt sous konfime l Etazini nan tèt kole ak patnè li yo, ap etidye posiblite pou ranfòse Misyon sipò sekirite miltinasyonal la. Epi asire l sipò MSS la bay ayisyen yo yon tan e kreye wout pou kondisyon ak sekirite k ap tabli pou Òganizasyon eleksyon yo.
Daprè sa nou li, chanjman sa se sitou pa rapò ak difikilte administrasyon an jwenn nan atire kontribisyon volontè pou misyon an, ki koute anviwon 200 milyon dola. Yo ta vle fè l tou pou opere chak mwa yo epi pou enkapasite li genyen pou l rive mete lòd rapid an Ayiti.
CP: Miami Herald
Atik sa se pwopriyete prive ©️ Gwoup Medya MAGHAITI 2024
