Selon direktris egzekitif Fondasyon Je Klere a (FJKL) Marie Yolène Gilles, gen pou pi piti 150 moun ki mouri nan masak gang yo te fè Kenskòf la. Responsab òganizasyon dwa moun nan fè deklarasyon sa jodi mèkredi 5 fevriye 2025 lan sou Magik 9.
Marie Yolène Gilles deklare anplis kantite moun sa yo ki mouri a genyen plis pase 100 kay ki pase anba flanm dife. Li fè revelasyon sa aprè temwanyaj li di l jwenn nan men abitan nan komin Kenskòf.
An menm tan, defansè dwa moun nan di jiskounye a gen moun ki disparèt paske akoz prezans gang ak zam yo nan zòn nan gen gwo dikilte pou genyen yon chif egzat sou kantite dega bandi yo fè nan komin nan.
N ap raple, nan dat ki te mèkredi 29 janvye 2025 lan, ansyen depite Kenskòf la Louis André Gustave te bay yon premye bilan ki te fè kwè genyen plis 44 moun ki mouri nan masak sa a. 8 jou aprè, chif yo kontinye ap ogmante, pandan kèk manm nan popilasyon an yo menm oblije al pran refij yo plizyè kote espesyalman nan lokal meri a.
Atik sa se pwopriyete prive ©️ Gwoup Medya MAGHAITI 2025
