Nan yon rapò yo pibliye jodi mèkredi 30 avril 2025 lan, Biwo Nasyonzini an Ayiti (BINUH) fè konnen gen 1 617 moun plis 35 timoun ki mouri pandan 3 premye mwa ane 2025 lan. Anplis viktim sa yo, yo di tou gen 580 lòt plis 10 timoun ki blese nan afwontman ki konn genyen ant gang, lapolis oubyen manm bridad yo. Epi genyen pou pi piti 189 prezime manm gang popilasyon an te bay bw@ k@le.
«Pandan premye trimès ane 2025 lan, sitiyasyon dwa moun yo an Ayiti toujou bay gwo kè sote. Li te genyen Krim, kidnaping ak kadejak». BINUH kontinye pou di : «Se konsa, sòti premye janvye pou rive 31 mas 2025 lan pou pi piti 1 617 moun te sibi zak ansasinay, 580 lòt te blese nan atak ki te gen gang yo, brigad epi lapolis». Yo mansyone genyen pou pi piti 189 prezime manm gang popilasyon an te bay bw@ k@le tou pandan menm moman sa a.
Yon lòt kote, yo soulinye nan menm peryòd la gen pou pi piti 61 ka kidnaping yo anrejistre. Moun sa yo te jwenn liberasyon yo pou lajan. E 63% kidnaping sa yo te fèt nan depatman Latibonit.
Pou sa ki gen pou wè ak vyolans seksyèl, yo di gen 333 fanm ak tifi ki te viktim. Ladan yo gen 96 % ki sibi vyòl, sitou vyòl kolektif anba men gang yo. Pou sa ki gade timoun yo, anplis chif yo te bay avan yo, yo fè konprann gen 35 ki te mouri epi gen 10 lòt ki te blese. Nan menm sans lan, yo soulinye gen anpil timoun ki te sibi maltretans e yo menm te fòse yo antre nan gang.
Pou fini, Biwo Nasyonzini an panche sou sistèm jistis la ki pap mache. Sa ki fè, selon yo, zafè enpòtan yo tankou ansasinay ansyen Prezidan Jovenel Moïse la ak divès masak ki te fèt nan lane 2018 yo mal pou limyè fèt sou yo. Men, yo pa kache satisfaksyon yo pa rapò ak 114 ka vyòl jij enstriksyon yo gentan tande nan tout peyi a.
Atik sa se pwopriyete prive ©️ Gwoup Medya MAGHAITI 2025
