Amnesty International, yon ajans k ap defann dwa moun nan mond lan deklare an Ayiti timoun yo fè fas ak rekritman, atak ak vyolans seksyèl gang yo nan mitan kriz la. Òganis dwa moun nan revele sa nan yon rapò li pibliye ayè mèkredi 12 fevriye 2025 lan.
Nan nouvo rapò sa, òganizasyon entènasyonal la fè konnen atravè zak vyolans yo ki pa sispann repete nan Pòtoprens ak zòn sou kote l yo, gang yo ap fè vyolans sou timoun yo nan peyi a. Selon sa yo detaye, kategori moun sa yo viktim yon pakèt abi dwa moun nan men gang, tankou rekritman, vyòl ak lòt fòm vyolans seksyèl, kidnapin, asasina ak blesi. Yo prezante tou enpak sitiyasyon sa sou timoun andikape yo.
Pi lwen, Amnesty International fè konprann zak vyolans yo vin pi plis sitou aprè ansasinay ansyen prezidan Jovenel Moïse nan mwa jiyè 2021 an. Pou apiye pozisyon yo a, yo eksplike pandan ane 2024 la, bandi yo touye anviwon 5 600 moun. E soulinye yo kontwole pifò kapital peyi a sa ki lakoz plis pase 5,5 milyon moun bezwen èd imanitè ijan.
Agnès Callamard ki se sekretè jeneral òganis la nan yon premye tan deklare, gang yo lakòz anpil detrès an Ayiti. Daprè sa l di, yo menase, bat, vyole epi touye timoun. «Yo responsab anpil vyolasyon timoun yo, tankou dwa yo genyen pou yo viv ak pou ale lekòl ansanm ak dwa yo genyen pou yo deplase lib», daprè deklarasyon li.
Nan rapò sa, òganizasyon dwa moun nan pale sou sitiyasyon moun andikape yo. Yo fè konnen timoun sa yo ap fè fas ak gwo riks lè y ap kouri pou vyolans gang yo pandan yo manke yon bagay avèk aparèy nesesè ki pou asiste yo.
Amnesty International di li kwè se moman pou kominote entènasyonal la, sitou donatè yo, ogmante jefò yo. Epi yo mande yo travay ak otorite ayisyèn yo ansanm ak sosyete sivil la pou prepare wout pou chanjman atravè solisyon ki baze sou dwa moun epi anpeche nouvo sik vyolans.
Bò kote pa gouvènman an, yo konseye li dwe konbat enpinite a, pandan yo ap kreye rapid vit sant jidisyè espesyalize pou pousuit vyolasyon grav dwa moun.
Kredi foto: UN NEWS
Atik sa se pwopriyete prive ©️ Gwoup Medya MAGHAITI 2025
