Ayè jedi 28 novanm 2024 la, FIFA sòti tout lis jwè ki nomine pou pri The Best la nan plizyè kategori. Pou fanm yo, jwè ayisyen an, Melchie Daëlle Dumornay tout moun konnen sou non Corventina nomine nan lis atakan pou pi bon ekip fanm ane 2024 la.
Se yon nouvo pa nonsèlman pou Corventina, men tou pou Ayiti. Puiske, se pou yon premye fwa nan tout istwa peyi a FIFA nonmen yon foutbolè ayisyen pou fè pati pi bon jwè ki ta dwe nan pi bon ekip sou yon ane.
Pou ane sa a, atakan Olympique Lyonnais a (OL), te patisipe anpil pou te pèmèt li genyen D1 fransè a, yo te finalis nan Lig Dè Chanpyon. Anplis sa, li te fini pi bon jèn jwè UEFA, e li te ranpòte pri jwè CONCACAF sou âne 2023-2024 la
Menmsi jwè ayisyen an nomine, men li ap fè fas kare ak plizyè lòt gwo jwè pou l ta rive nan ekip tip fanm yo. Anfas li nou jwenn jwè tankou Adriana, Barbra Banda, Klara Bühl, Mariona Caldentey,Tabitha Chawinga, Temwa Chawinga, Kadidiatou Diani, Graham Hansen, Lauren Hemp, Lauren James, Marie-Antoinette Katoto, Racheal Kundananji, Kerolin Nicoli, Ewa Pajor, Salma Paralluelo, Mayra Ramírez, Trinity Rodman, Léa Schüller, Khadija Shaw, Sophia Smith, Mallory Shanson.
N ap soulinye, vòt yo ap fini madi k ap 10 desanm k ap vini la. Se sa k fè pou li kapab fè pati pi bon ekip FIFA ane a, tout Ayisyen kapab vote pou li nan lyen sa a : https://www.fifa.com/fr/the-best-fifa-football-awards/2024/womens-11
Kredi Foto : Damian LG
Atik sa se pwopriyete prive ©️ Gwoup Medya MAGHAITI 2024
