Aprè lanmò yon prezime bandi ki gen ti non “Zo pwason ” nan Nip, patikilyèman nan lokalite Kokotye Dichenn nan dat 31 me 2022, sou responsabilite komisè Jean Erns Muscadin, kote yon videyo ki t ap sikile sou rezo sosyal yo te montre seri entèwogasyon an, dosye sa te fè anpil pale nan laprès ak sou rezo sosyal yo.
Aksyon komisè Mucadin an te lage yon gwo polemik nan sosyete a parapò ak krim sa, kote gen moun ki te dakò ak zak sila, men konsa tou te genyen ki kondane li. Anplis, Fondasyon Je Klere (FJK) ak lòt ankò, pa te pran tan pou li te kondane ak fikse pozisyon yo atravè yon nòt pou mande kondanasyon ak dedomajman fanmi viktim lan.
Kèk tan komisè Muscadin te sòti nan silans li pou li te ofri yon entèvyou ak yon radyo ki rele “FRAG MAX”, konsa li te di : “Gen sitwayen ki la, ki paka pè bandi. Li te voye repons ban m, mwen reponn li. Se pa “UDMO” ki fè zak sa, men se pito nou”.
Jounen Jodia, Chèf gang 5 segonn lan pran 2 bis chaje moun ki fè wout Miragwann, nan repons ak komisè Muscadin, atravè yon videyo k ap sikile sou tout rezo sosyal yo.
” Pandan, nou tire Inosan an, nou di se sòlda m li ye, li rele zo pwason oswa zo koulèv, tout zo sa yo. Depi moun nan sot vilaj Dedye, nou tiye yo nan Miragwann. Ou menm kòm Komisè w ap fè yon ekip bagay, ou te di m p ap ka jwenn moun w yo. Mwen gen 2 bis mwen pran ki sòti Miragwann, m ap tann w vin chèche yo komisè Muscadin “. Deklarasyon chèf gang vilaj Dedye a.
Nan yon entèvyou sendikalis Méhu Changeux bay medya “Passion Info Plus” li konfime bandi pran 2 tibis ak tout moun Miragwan jodi vandredi 10 jen an.
Nan dosye sa, lapolis ak lajistis poko janm pwononse sou li. Kote n rive nan yon polemik ant Muscadin ak Izo k ap montre pouvwa yo.
Se kòmsi n ap vanse nan yon sosyete san etadedwa ak yon leta enkapab pou rezoud pwoblèm ensekirite a k ap ravaje peyi a depi yon bon bout tan.
© Tous droits réservés – Groupe Média MAGHAITI 2022
