Abitan k ap viv Solino, riyèl Anglad, Dèlma 24 ak Fò Nasyonal pase yon move moman pandan rès jounen jedi 15 dawout 2024 la. Sa rive akoz gang ki nan kowalisyon Viv ansanm yo atake divès katye sa yo.
Depi nan lè 6 zè nan aprè midi nou te ka konstate plizyè konfrè jounalis k ap viv avni Poupla ap mande konkou pou katye Solino. Sa ki te pouse nou al chache konnen.
Katye Solino depi kèk tan rete youn nan prensipal objektif bandi yo pou tabli tout bon baz yo. Anpil tantativ fèt sa, men polisye zòn nan toujou kanpe an kwa.
Ayè jedi 15 dawout la, pou yon lòt fwa ankò gang yo atake zòn nan nan lide pou mete yon chèf yo ta sòti ak li Gran Ravin pou vin dirije Solino. Yon sitiyasyon ki leve plim sou do polisye ki rete la yo e ki te vin bay yon repons ak atak sa, daprè sa yon sous ki pa vle non l site fè nou konnen.
Kriminèl yo ki vle reyalize tout bon plan yo a pase anba flanm dife plizyè kay. Jiska 9è 55 nan aswè, abitan yo pa t sispann mande kout men otorite yo.
Fas ak sitiyasyon sa, kèk abitan pa kache kòlè yo. Pou yo menm, eta ijans lan se yon mannyè pou tire sou yo pou yo pa al manifeste kont gouvènman tranzisyon an.
Pandan kèk moun ap kouri kite kay yo nan Solino, sou wout nasyonal nimewo 1 an sitou nan nivo Kafou Vensan, Sat ak Kazo bal pa sispann chante jiska 10 zè nan lannuit ki te 15 dawout la.
sa se pwopriyete prive ©️ Gwoup Medya MAGHAITI 2024
