Sòti vandredi 23 pou rive dimanch 25 dawout 2024 la, anviwon 6 moun mouri epi plizyè kay ak jaden pase anba flanm dife. Sa rive akoz nèg ak zam nan Gwomòn nan gwo afwontman, daprè majistra komin nan, Hubert Cénéac.
Atak gang yo kòmanse nan Gwomòn aprè yon gwoup bandi ta kidnape yon tifi 5 lane nan twazyèm seksyon Rivyèv Blanch. Popilasyon an pa kache pou lonje dwèt sou bandi yo ki nan baz Kokorat san ras kòm responsab zak sa.
Hubert Cénéac ki t ap pale sou Radyo Ginen jodi madi 27 dawout la, fè konnen bandi yo nan Kokorat san ras al chache lòt gwoup ki ta fè zak la. Yon fason selon majistra a pou yo jistifye se pa yo menm tandiske yo ta pase anba al chache timoun nan nan men kriminèl yo.
Daprè sa otorite a di, se sou pretèks chache timoun nan menm yo boule kay ak jaden e menm touye anviwon 6 moun. Li fè konnen gen anpil manm nan popilasyon nan lokalite Kamas ki oblije kouri kite kay yo al pran refij nan vil la.
Pi lwen, majistra komin Gwomòn nan fè konnen bandi ki nan baz Kokorat san ras yo kenbe yon endividi ki te nan fè zak kidnapin nan sou timoun nan. Endividi sa deklare se yo 6 ki te fè aksyon an.
Pou fini, Hubert Cénéac fè konnen komin nan konnen yon sitiyasyon tansyon sòti vandredi pou rive dimanch swa. Li soulinye bandi yo m antre lakay moun pandan l kritike jan otorite yo nan leta a kite zòn nan bay nèg ak zam.
Atik sa se pwopriyete prive ©️ Gwoup Medya MAGHAITI 2024
