Akoz lapli ki genyen sou vil Jeremi depi 30 novanm pase a gen pou pi piti 3 moun ki pèdi lavi yo, 13 blese epi 3 lòt disparèt. Moun sa yo rive viktim nan gwo inondasyon ki genyen nan plizyè kote nan vil la.
Dam Mari, Chanbelan, Mafran, Moron, ak Leon se pami kèk kote nan Jeremi ki anba dlo. Daprè plizyè abitan, lapli te kòmanse tonbe sou depatman Grandans depi 30 novanm pase a pou rive ayè madi 3 desanm 2024.
Selon presizyon majistra vil la, Sylmata Pierre nan viktim yo genyen 2 timoun yo te jwenn kò yo chak la yon kote, youn Vèsay lòt la Lasous. Pou lòt moun nan, daprè plizyè videyo ki pataje sou rezo sosyo yo, yo rive jwenn kò a nan zòn Ti piman. Pou sa ki gen pou wè ak blese yo, genyen 8 timoun, 4 fanm ak yon gason ki pou kounye a ap pran swen nan lopital Sen Antwàn.
Sitiyasyon sa lakoz tou anviwon 60 moun kite lakay yo pou al rete nan kan, pandan genyen plizyè kay ki kraze. Nan sans sa, majistra zòn nan mande prese prese èd leta yon fason pou kapab lonje men bay fanmi viktim yo paske Jeremi aktyèlman ap fè fas ak yon gwo kriz imanitè.
N ap fè konnen, lapli sa ki ap tonbe sou depatman Grandans, Lwès, Nò, Sant ak Sid peyi a li pa gen anyen pou wè ak siklòn, puiske Pwoteksyon Sivil te fè konprann sezon siklonik la fini depi samdi 30 novanm 2024 la. Daprè Inite Idwometeyowolojik Ayiti (UHM) se pito yon Fwon Fwa ki sou tèt peyi a, e ta dwe gen aktivite lapli pandan tout semèn nan.
CP: Tinèg Dame Mari Live
© Tous droits réservés – Groupe Média MAGHAITI 2024
