Byen bonè jodi madi 19 novanm 2024 la, 18 bandi jwenn lanmò yo ak blese nan operasyon lapolis la ap mennen aktyèlman nan Petyonvil ak zòn sou kote l yo. Selon deklarasyon pòt pawòl lapolis la, Lionel Lazarre bandi sa yo te nan yon kamyon e te gen entansyon anvayi plizyè zòn pami yo Petyonvil ak Dèlma.
«Nan Petyonvil sèlman genyen omwen 18 bandi pou jodi a ki swa blese oubyen mouri nan kad entèvansyon lapolis», daprè sa pòt pawòl adjwen lapolis la deklare sou Radyo Televizyon Karayib maten an.
Pi lwen, li fè konnen nan zòn Pòs Machan ak Sen Antwàn, lapolis sezi tou yon ti bis ak 3 kalashnikòv ki te nan machin sa a anplis bandi ki ta tonbe tou. Responsab la anonse nan moman sa menm lapolis ap mennen plizyè operasyon nan Boudon ak Kanapevè puiske se nan zòn sa bandi yo ta al kache aprè fòs lòd yo te bare yo nan Petyonvil.
Mete sou sa li fè konprann Lapolis Nasyonal Ayiti (PNH) rive sezi kamyon ki te gen ladan li plizyè nèg ak zam nan zòn ri Panamerikèn. Se ladan l yo rekipere yon dwon, plizyè santèn minisyon plizyè kalib.
Pou sa ki gen pou wè ak operasyon k ap mennen yo, mesye Lazarre eksplike yo te jwenn anpil enfòmasyon sou nèg yo ki te anonse yo pral pran Dèlma, ak Petyonvil. Se sa k fè li fè konprann kòmandman lapolis la te reyini an ijans pou te pase kèk konsiy ak responsab Lwès 1, 2 inite espesyalize yo, responsab komisarya yo pou yo te rete vijilan.
Pou kounye a, ansyen sendikalis la mande popilasyon an pou li kontinye ede lapolis la pou kenbe bandi sa yo ki gaye nan zòn yo. Li fè konprann se rezon sa ki eksplike moun Kanapevè ak Boudon ap tande tout bri bal y ap tande yo nan moman an.
Atik sa se pwopriyete prive ©️ Gwoup Medya MAGHAITI 2024
