Selon jounal Gazette Haïti, ansyen Premye minis Ayiti a, Garry Conille pa nan peyi a aktyèlman. Ansyen chèf gouvènman an kite peyi a ankachèt jodi samdi 16 novanm 2024 la pou al jwenn fanmi li Etazini.
Kòm ayewopò entènasyonal Tousen Louvèti a fèmen, jounal la fè konnen doktè a te oblije ale Okap. Kote li pran avyon pou l al sou zile Tik ak Kaykòs, se la li ta dwe pran vòl pou Miami avan menm li antre New York pou al jwenn fanmi li.
Vizit nan lopital Jeneral, nan baz lame a, deplasman pou al nan kanal Wanament lan, yon kout pye nan Senmak aprè masak Ponsonde a, fowòm nan lokalite Kenskòf, angaje konpayi Studebaker Defense Group pou garanti dosye sekirite nan peyi a se pami sa PM nan te rive fè pandan prèske 5 mwa li te gen nan tèt peyi a.
N ap raple nan diskou li te fè nan vizit li te rann polisye kenyan yo nan Klèsin jou ki te mèkredi 26 jen 2024 la, doktè a te pwomèt popilasyon an gouvènman li an ap tabli sekirite nan peyi.
«N ap reprann peyi nou an men kay pa kay, katye pa katye, vil pa vil», se pawòl sa yo li te deklare devan tout nasyon an.
Atik sa se pwopriyete prive ©️ Gwoup Medya MAGHAITI 2024
