Nan yon mesaj li pibliye sou paj fesbouk li jodi madi 24 jen 2025 lan anbasad amerikèn an Ayiti mande sitwayen ameriken l yo kite Ayiti byen vit. Se nan sans sa a menm responsab yo fè resòtisan ameriken yo konnen gen divès vòl komèsyal ki rekòmanse an Ayiti. Pami yo li site vòl ki fèt nan ayewopò Entènasyonal Okap la, Antoine Simon nan Okay ak ti ayewopò Guy Malary nan Pòtoprens, yo fè sa nan lide pou yo kapab pwofite planifye vol yo pou kite peyi a.
Nan mesaj sa a, anbasad la soulinye li aprann gen kèk sitwayen ameriken k ap vwayaje nan elikoptè pou ale Okap nan vòl ki pa komèsyal. Fas ak aksyon sa yo li avèti yo pou tip vwayaj sa yo puiske li di yo gen gwo danje ladan yo.
« Anplwaye gouvènman ameriken pa gen dwa pran vòl komèsyal pou antre osnon sòti Pòtoprens akoz restriksyon Federal Aviation Administration (FAA) mete ansanm ak risk sa prezante » se pawòl sa yo ki ekri nan mesaj yo a.
Anbasad la pwofite konseye sitwayen ameriken yo evite foul, swiv nouvèl lokal yo, rete vijilan, pa sòti lannwit, epi prepare yo si ta gen nesesite pou rete anndan kay pou yon bon tan. Pi devan, li di tou yo dwe asire dokiman vwayaj yo valid, mete yo sou je epi yo dwe toujou gen pyès idantite sou yo.
Pou fini, responsab anbasad la mete disponib yon seri nimewo telefòn ak yon adrès imèl. Tout sa se yon fason pou tout sitwayen ki ta gen ijans yo kapab kontakte yo.
Atik sa se pwopriyete prive © Gwoup Medya MAGHAITI 2025
