Chèf gouvènman ayisyen an, Alix Didier Fils-Aimé jodi a mande manm popilasyon an pou pran pasyans ak kouraj puiske li deklare enmi an ap pèdi e Ayiti ap gen lapè. Li fè deklarasyon sa jodi jedi 30 janvye 2025 lan, nan Direksyon Jeneral Polis Nasyonal Ayiti a (DGPNH).
Pandan popilasyon Kenskòf la ap viktim anba bal nèg ak zam yo, premye minis lan Alix Didier Fils-Aimé ap tante ba yo espwa. Nan yon pwen pou laprès aprè yon rankont ak direktè jeneral PNH la, Rameau Normil, chèf laprimati a mande pèp ayisyen an pou l rete vijilan an menm tan an pou l gen kouraj ak pasyans. Daprè sa l soulinye, lòd ap retabli nan peyi a nan pa lontan.
«Rankont sa ki te fèt an prezans minis Jistis lan, Patrick Pélissier, minis Enteryè a Paul Antoine Bien-Aimé ak Sekretè leta ak sekirite piblik la, Mario Andrésol, make yon etap enpòtan nan batay kont gang yo nan peyi a», daprè sa ministè Kominikasyon ak Lakilti (MCC) di nan yon kominike.
Nan menm kominike sa yo mansyone li se yon prèv vivan tou ki montre yon leta ki nan pozisyon pou l batay epi mobilize san pran souf pou rive tabli lapè ak otorite souveren sou tout teritwa nasyonal la.
«Nan yon klima ijans ak responsablite, reyinyon estratejik sa a te estriktire nan yon sèl priyorite: garanti sekirite pèp ayisyen an», daprè sa nou li. An menm tan, li pèsiste sou nesesite ki genyen pou leta pa fè bak puiske yo defann se yon enperatif pou retabli konfyans, ranfòse kowòdinasyon ant ajans ki fè respekte lalwa ak kenbe bandi k ap simen latwoublay yo.
Pou fini, otorite yo di yo pran yon bann gwo desizyon pou bay yon repons ak kriminèl yo epi reprann kontwòl zòn ki gen vyolans yo.
Atik sa se pwopriyete prive ©️ Gwoup Medya MAGHAITI 2025
