Asosiyasyon Ayisyen Medya Anliy yo (AHML) atravè plizyè manm te fè gwo deplasman pou te patisipe nan atelye fòmasyon Direksyon Jeneral Pwoteksyon Sivil (DGPC) te òganize 13 ak 14 dawout 2024 pase a. Se anba tèm “kominikasyon kriz ak jesyon riks katastwòf” 2 jounen fòmasyon ak egzèsis tab sa yo te fèt nan lokal enstitisyon an nan prezans divès gwo responsab.
Pou premye jounen atelye a ki te fèt madi 13 dawout la, Premye minis Garry Conille te louvri aktivite a pandan l te pwofite raple enpòtans reyalizasyon sa yo. Se menm jan an tou, responsab yo nan enstitisyon an te pran douvan pou te pèmèt aprantisaj la te fèt byen epi fè egzèsis similasyon pou te mete tout konesans yo an pratik.
“Kominikasyon ak sansibilizasyon nan jesyon riks ak dezas rete yon bagay ki plis pase enpòtan nan jwenn solisyon ak tout kriz peyi a ap konnen“, daprè deklarasyon chèf gouvènman an. Yon lòt bò, chèf primati a te pwofite fè jounalis yo konnen yo se aktè ki enpòtan nan fòme epi enfòme popilasyon an nan tan nòmal ak nan tan ki gen ijans yo.
Pou sa ki konsène 2yèm jounen an, direktè jeneral la, Emmanuel Pierre te fè gwo rale sou defi yo, e plizyè lòt responsab keseswa nan Inite Idwometeyowolojik Ayiti (UHM) oubyen nan Pwoteksyon Sivil te montre kilè li enpòtan pou enfòme popilasyon an e siyifikasyon koulè alèt ki konn bay yo.
N ap soulinye nan aktivite sa tou, reprezantan medya ki te la yo te gen chans fè echanj ant yo ak responsab yo epi te rive bay kèk estrateji kominikasyon ki ale ak sitiyasyon ijans yo. Bò kote pa direktè Emmanuel Pierre, li deklare se yon bon baz pou yo menm e yo satisfè pou jan sa te fèt la.
“Nou te planifye e yo reponn apèl la se yon santiman satisfaksyon pou nou, nan mezi kote kalite deba yo, moun ki te prezan yo, echanj yo pwouve se yon retisit“, se pawòl nimewo 1 nan DGPC a ki anonse Gran nò a ak Sid la yo menm tou ap gen pou benefisye seyans pa yo tou.
Mag Haiti, Hpost5, Haiti Live News, le Facteur, Vmagazine, T-Check, Ted’Actu, Le Courrier de la Nation, Le National, Alolakay TV, VOA KREYÒL, Enquet’Action, Entretien 2000 se pami divès medya ki te patisipe nan atelye fòmasyon sa.
sa se pwopriyete prive ©️ Gwoup Medya MAGHAITI 2024
