Nan yon nòt yo pibliye jodi mèkredi 25 desanm 2024 la, Asosiyasyon Ayisyen Medya Anliy yo (AHML) di li kondane ansasinay 2 jounalis yo nan atak gang yo fè sou lopital Jeneral la. Daprè yo menm, minis sante a, Duckenson Lorthe Blema se premye responsab dram sa ki pase ayè madi 24 desanm nan.
« Asosiyasyon Ayisyen Medya Anliy yo (AHML) kondane ak tout fòs li ansasinay jounalis Mackendy Natoux, Jimmy Jean, ak polisye Daniel Renaud ki fèt madi 24 desanm 2024 la », daprè sa nou li nan nòt sa ki kondane tou 7 lòt jounalis ki rive blese nan gwo atak sa teyoris “Viv ansanm” yo fè sou pi gwo lopital peyi a.
Pi lwen, responsab yo nan asosiyasyon sa lonje dwèt yo sou minis sante a ak gouvènman an kòm responsab zak malonèt sa ki rive a. Paske yo eksplike nan yon premye tan, jounalis yo te al nan lopital la se te sou envitasyon minis lan, e li te menm rankontre, avan sa, ak plizyè direktè epi lòt responsab lopital la. Nan yon lòt tan, yo fè konnen minis lan pa t menm avèti fòs lòd yo sa li ta pral fè a.
« Nan sans sa, AHML pran minis Duckenson Lorthe Blema kòm premye responsab sa ki fèt la. Paske li pa t byen planifye inisyativ li a ak lapolis epi Lame Ayiti (FAD’H), sa ki fè gen ansasinay sa kèk lè avan fèt Nwèl la. », toujou daprè sa yo deklare.
Nan sans sa, pandan yo voye senpati bay fanmi ki afekte yo, yo pwofite mande gouvènman an pou sispann ak divès nòt kondanasyon yo, ki selon yo pa sifi. Yo mande pito pou gouvènman Alix Didier Fils-Aimé a ak tout Konsèy Prezidansyèl Tranzisyon an (KPT) fè yon fason pou bay jistis epi dedomaje viktim dram sa.
N ap raple, nan yon konferans pou laprès li te bay aprè zak la, Minis lan te demanti pawòl ki fè kwè fòs lòd yo pa t okouran sa l ta pral fè a. Se pou sa, doktè Lorthe te mande pou tout moun pran responsabilite yo pandan l te pwofite deklare : « Ministè a te gen garanti nan men fòs lòd yo pou tout dispozisyon te pran pou garanti sekirite reouvèti lopital Jeneral ».
Atik sa se pwopriyete prive © Gwoup Medya MAGHAITI 2024
