Nan yon mesaj li pibliye sou kont X li jodi vandredi 24 janvye 2025 lan, pòt pawòl Mezon Blanch lan, Karoline Leavitt fè konnen administrasyon Trump lan gentan kòmanse voye migran san papye yo tounen lakay yo.
«Vòl depòtasyon yo kòmanse deja. Prezidan Trump voye yon mesaj klè bay tout mond lan», se sa responsab la deklare nan mesaj li a pandan li avèti tout moun pou di : «Si ou antre Etazini ilegalman, w ap sibi konsekans yo».
Nan menm sans sa, genyen New York Times ak NBC News efektivman ki di genyen 2 avyon militè ki gentan mennen migran tounen lakay yo. Vòl sa yo te sòti nan vil Virginie ak Texas, mèkredi ak jedi ki sot pase la. E yo tou 2 te ateri Gwatemala, sa ki ta vle di se ta sitwayen gwatemaltèk yo yo gentan voye lakay yo.
Jiskounye a, selon pòt pawòl la, ajan Sèvis Imigrasyon ak Dwàn yo (ICE) rive arete 538 migran kriminèl san papye Etazini. Ladan yo nou jwenn moun ki sòti Afganistan, Angola, Bolivi, Brezil, Kolonbi, Ekwatè, Repiblik Dominikèn, Ondiras, Meksik, Nikaragwa, Senegal, Gwatemala, Ayiti, Venezwela ak Salvadò.
Medya ameriken yo soulinye migran sa yo se moun ki konn fè agresyon seksyèl, vòl, kase bisnis moun, trafik dwòg, ak zam, ak vyolans domestik. Epi pou sèl grenn Ayisyen yo pran an, yo di se ta yon manm gang.
Deklarasyon madanm Leavitt la vini nan yon moman kote New York Times te anonse byen bonè jodi vandredi a depòtasyon yo konsène moun Biden yo tou. Daprè sa yo te mansyone, administrasyon Donald Trump lan siyen depi ayè jedi 23 janvye a yon nòt kote li bay ajan Sèvis Imigrasyon ak Dwàn yo (ICE) pouvwa pou depòte ni moun Biden yo ni moun ki te antre Etazini gras ak aplikasyon CBP One nan. Yon chif yo estime ki nan 1,4 milyon migran.
Credit Photo: Fox News
Atik sa se pwopriyete prive ©️ Gwoup Medya MAGHAITI 2025
