Nan yon atik Los Angeles Times pibliye jodi jedi 17 oktòb 2024 la, yo fè konnen achidyosèz vil Los Angeles la dakò pou l peye 880 milyon dola vèt ak moun ki viktim vyolans seksyèl nan men pè ki pase nan legliz sa a. Selon sa yo di, lajan sa pral jwenn 1 353 viktim, ki deklare pè legliz katolik sa te konn fè vyolans seksyèl sou yo lè yo te minè.
«Mwen dezole pou chak aksyon sa yo ki pase a. Mwen espere, lajan sa ap kapab nan yon sans retire nan soufrans gason ak fanm sa yo», daprè deklarasyon achevèk José H Gomez New York Times rapòte. Pandantan sa, yo fè konprann ekspè tankou Me Morgan Stewart fè konnen lajan sa se pi gwo mago yon dyosèz rive dakò pou bay nan dosye vyòl ki pa sispann fèt sitou nan achidyosèz Los Angeles la.
Pi lwen, achevèk la soulinye lajan ki pral peye viktim sa yo pa gen anyen pou wè ak don ki bay pou pawàs yo, lekòl yo ak lòt misyon yo. Men se pito nan rezèv, envestisman, prè yo fè, ak lajan moun ki enplike nan dosye a ap peye li ap sòti.
«Aprè abi seksyèl sa yo, moun sa yo pase plizyè 10èn lane ap soufri. Plizyè dizèn nan yo mouri tou, sa k ap viv yo fin granmoun», selon pawòl avoka Morgan Stewart, ki t ap negosye lajan sa sitou pou kèk kliyan li.
N ap fè konnen, se pa premye fwa achidyosèz vil sa, ki gen ladan l plis pase 4 milyon kretyen katolik ak anviwon 400 pawàs, ap bay lajan ak moun ki te viktim nan men pè ki t ap sèvi nan kominote sa a. Nan lane 2007, yo te peye 660 milyon dola pou 508 moun ki te pote plent. An 2013, menm yo menm nan te bay 9.9 milyon dola ameriken ak 4 gason ki te di yo te viktim pedofili nan men pè Michael Baker.
Selon Le Figaro pè Michael Baker sa, se youn nan pi gwo pedofil ki genyen Etazini. Se sa k fè l eksplike nanmenm moman sa yo, yo te menm akize l dèske li te fè tizonnay sou 23 tigason sòti lane 1974 rive 2000.
Atik sa se pwopriyete prive © Gwoup Medya MAGHAITI 2024
