Jounen lendi 19 dawout 2024 la, abitan k ap viv nan katye Solino yo pran lari a nan lide pou denonse fenomèn ensekirite a.
Depi kèk tan, Solino pa sispann sibi atak gang ak zam ki nan kowalisyon Viv Ansanm. Seri atak sa yo fèt yon fason pou gwoup gang sa yo rive kontwole plis teritwa epi enstale yon chèf bandi nan katye sa.
Pou denonse ansanm zak sa yo, abitan yo manifeste nan lari Pòtoprens. Nan revandikasyon yo, yo mande pou otorite polisyè yo aji fas ak vyolans bandi yo.
Pandantan sa divès manifestan sa yo k ap mande sekirite a, te resevwa gaz lakrymojèn nan men ajan fòs lòd yo avan yo ta pral rive kafou Ayewopò.
Yon lòt kote, kawoutyou t ap boule nan divès kwen nan Nazon, Lali ak kafou Ayewopò.
N ap raple, depi nan fen semèn pase a kout zam t ap chante nan katye Solino. Pandan atak sa yo, bandi yo te boule plizyè kay sa ki lakoz plizyè fanmi te oblije kouri kite kay yo.
Atik sa se pwopriyete prive ©️ Gwoup Medya MAGHAITI 2024
