Nan lannuit mèkredi ki te 29 janvye 2025 lan, yon avyon American Airlines ak yon elikoptè lame te kwaze ansanm, kote tou 2 aparèy yo rive kraze epi tonbe nan flèv glase nan Potomac, toupre ayewopò Ronald-Reagan nan. Daprè otorite ameriken yo, 2 aparèy yo te genyen 67 moun, e yo deklare tout moun sa yo pèdi lavi yo nan aksidan sa.
« Malerezman pa gen youn nan moun yo ki pa mouri, se yon lannuit tristès pou kapital nou an ak nasyon nou an », se pawòl sa yo prezidan Donald Trump te deklare nan sikonstans lan.
Nan moun yo idantifye yo nou jwenn 4 manm ekipaj avyon konpayi ameriken an. Genyen pilòt la ki se Jonathan Campos, ko pilòt la, Samuel Lilley ak 2 otès ki se youn aprè lòt Ian Epstein ak Danasia Elder Brown.
Bò kote pasaje yo genyen plizyè fanmi ki peri pami yo Donna Smojice Livingston, mari l ki pote non Peter ak 2 pitit fi li ki se Everly ak Alydia. Pitit moun sa yo genyen youn aprè lòt 14 ak 11 lane.
Nan dram sa yon pakèt atlèt ris, ameriken ak chinwa mouri ak kèk manm nan fanmi yo. Ladan yo nou jwenn patinè Evgenia Shishkova, ak mari l Vadim Naoumov ki te chanpyon mond lan nan lane 1994. Pou lòt espòtif yo nan yon premye tan, nou jwenn Spencer Lane ak manman l Christine Lane, Jinna Han ak manman l Jin-Han, Cory Haynos ak tout paran l yo.
Nan yon lòt tan, genyen antrenè Alexandre Kirsanov ak elèv li yo Angela Yang ak Sean Kay ak ansyen patinè Inna Volyanskaïa. Yon gwoup 7 zanmi pami yo Michael Stovall, ak Jesse Pitcher. Epi te genyen konsiltan Asra Hussain Raza, Wendy Jo Shaffer ak plizyè avoka tankou Elizabeth Anne Keys, Sarah Lee Best ak Kiah Duggins, ki li menm te travay nan Mezon Blanch sou administrasyon Barack Obama a.
Pou non viktim elikoptè lame ameriken an, Black Hawk, otorite yo di youn nan viktim yo idantifye sou non Ryan O’Hara, se te chèf ekip la.
Pou kounye a, ekip ponpye ki sou plas la rive jwenn 40 kò nan dlo a e otorite yo anonse tou yo jwenn 2 bwàt nwa avyon an. Selon deklarasyon chèf yo a, John Donnelly, yo ap fè kou yo konnen pou jwenn kò tout viktim yo yon fason pou yo ka remèt fanmi yo kadav yo.
Atik sa se pwopriyete prive ©️ Gwoup Medya MAGHAITI 2025
